Ҳиндистон ҳукумати мамлакатда коронавируснинг янги XE штамми билан касалланиш бўйича биринчи ҳолатни тасдиқлади, деб хабар бермоқда Hindustan Times.
Брихан Мумбай Муниципал корпорацияси (BМC) баёнотида айтилишича, омикрон штаммининг икки кичик тури BА.1 ва BА.2 дан иборат ушбу гибрид февраль ойида Жанубий Африкадан Мумбайга келган 50 ёшли аёлда аниқланган. Беморда ҳеч қандай қўшимча касаллик бўлмаган, коронавирус эса симптомсиз кечган. Аёлга деярли бир ой ўтиб — март ойида ташхис қўйилгач, у карантинга ётқизилган.
XE — омикрон туридаги штаммларнинг мутацияси бўлиб, дастлабки маълумотларга кўра, у бошқа мутацияларга қараганда тахминан 10 фоиз тезроқ юқиши мумкин. Жаҳон соғлиқни сақлаш ташкилоти (ЖССТ) маълумотларида қайд этилишича, XE (BА.1-BА.2) биринчи марта 19 январда Буюк Британияда аниқланган ва шундан бери мазкур штамм билан касалланишга оид 600 дан ортиқ ҳолатлар ҳақида хабар берилган.
Нашрнинг ёзишича, янги штамми Таиланд ва Янги Зеландияда ҳам топилган. ЖССТ мутацияни муҳокама қилишдан олдин қўшимча маълумотлар кераклигини айтди.
«Дастлабки ҳисоб-китоблар ушбу штаммнинг ўсиш суръати БА.2 га нисбатан 10 фоизга устунлигини кўрсатмоқда. XE оғирроқ кечиши ҳақида ҳеч қандай далил йўқ, шу кунгача омикрон штаммининг барча вариантлари унчалик оғир кечмаган», — дейди ЖССТ баёнотида.
Ташкилот XE симптомлари баъзилар учун енгил, бошқалар учун оғир бўлиши мумкинлигини таъкидлади. Ушбу янги штамм тез тарқалмоқда.
Изоҳ (0)