“50 ming dollar investitsiya qildik va yana 250 ming dollar kiritmoqchimiz” — Rossiyaning yetkazib berish xizmati O‘zbekiston bozori haqida

Rossiyaning Broniboy yetkazib berish xizmati O‘zbekistonda ish boshladi. Bu haqda “Daryo”ga kompaniya vakillari xabar berdi.

Ayni damda xizmat Toshkentda ishga tushdi, unga 50 dan ortiq muassasa ulangan. Yil oxirigacha kompaniya Samarqand va Buxoroda ish boshlash, 500 dan ortiq hamkorlarni ulash va kuniga 4000 dan ortiq buyurtmalarni bajarishni rejalashtirgan.

Xizmat asosiy e’tiborni restoranlar, do‘konlar, dorixonalar va gul do‘konlaridan yetkazib berishga qaratadi.

Hozircha O‘zbekistonda yetkazib berish bozori shakllanmagan: barcha muassasalar o‘z mehmonlarini juda qadrlashadi va imkon qadar tezroq yetkazib berish uchun barcha vositalardan foydalanishadi, bozorning muhim ulushini taksi egallaydi. Biroq “oxirgi milning” logistikasi o‘zgaruvchilarga juda sezgir — mijoz buyurtmasi qachon va qanday yetkazilishini bilmaydi.

Kompaniya O‘zbekiston yetkazib berish bozorini 20—25 milliard rublga (300 mln dollar atrofida) baholamoqda, Express 24 xizmatini asosiy raqobatchisi deb hisoblaydi. Broniboy O‘zbekistonga 50 ming dollarga yaqin investitsiya qilgan va yana taxminan 250 ming dollarni kiritmoqchi. Xizmat joriy yilning oxirigacha “nolga” chiqmoqchi.

Yaqin bir necha yil ichida kompaniya mamlakatdagi 50 mingdan ortiq aholisi bo‘lgan barcha shaharlarida ish boshlashni rejalashtirgan.

2017-yilda tashkil etilgan Broniboy  hozirda Rossiyaning 17 ta shahrida, jumladan, Krasnodar, Moskva, Yekaterinburg, Qozon, Novosibirsk, Rostov-na-Donu va boshqalarda ishlaydi.

Avvalroq Rossiyaning “Dobrotsen” kompaniyasi O‘zbekistondagi do‘konlari yopilishi haqida xabar berilgan edi.