«50 минг доллар инвестиция қилдик ва яна 250 минг доллар киритмоқчимиз» — Россиянинг етказиб бериш хизмати Ўзбекистон бозори ҳақида

Россиянинг Broniboy етказиб бериш хизмати Ўзбекистонда иш бошлади. Бу ҳақда «Дарё»га компания вакиллари хабар берди.

Айни дамда хизмат Тошкентда ишга тушди, унга 50 дан ортиқ муассаса уланган. Йил охиригача компания Самарқанд ва Бухорода иш бошлаш, 500 дан ортиқ ҳамкорларни улаш ва кунига 4000 дан ортиқ буюртмаларни бажаришни режалаштирган.

Хизмат асосий эътиборни ресторанлар, дўконлар, дорихоналар ва гул дўконларидан етказиб беришга қаратади.

Ҳозирча Ўзбекистонда етказиб бериш бозори шаклланмаган: барча муассасалар ўз меҳмонларини жуда қадрлашади ва имкон қадар тезроқ етказиб бериш учун барча воситалардан фойдаланишади, бозорнинг муҳим улушини такси эгаллайди. Бироқ «охирги милнинг» логистикаси ўзгарувчиларга жуда сезгир — мижоз буюртмаси қачон ва қандай етказилишини билмайди.

Компания Ўзбекистон етказиб бериш бозорини 20—25 миллиард рублга (300 млн доллар атрофида) баҳоламоқда, Express 24 хизматини асосий рақобатчиси деб ҳисоблайди. Broniboy Ўзбекистонга 50 минг долларга яқин инвестиция қилган ва яна тахминан 250 минг долларни киритмоқчи. Хизмат жорий йилнинг охиригача «нолга» чиқмоқчи.

Яқин бир неча йил ичида компания мамлакатдаги 50 мингдан ортиқ аҳолиси бўлган барча шаҳарларида иш бошлашни режалаштирган.

2017 йилда ташкил этилган Broniboy  ҳозирда Россиянинг 17 та шаҳрида, жумладан, Краснодар, Москва, Екатеринбург, Қозон, Новосибирск, Ростов-на-Дону ва бошқаларда ишлайди.

Аввалроқ Россиянинг «Доброцен» компанияси Ўзбекистондаги дўконлари ёпилиши ҳақида хабар берилган эди.