AQSH sovet davrida ishlab chiqarilgan va hozirda Yevropadagi ittifoqchilarida saqlanayotgan tanklarni Ukrainaga topshirishda vositachilik qiladi. Bu haqda AQSH prezidenti Jo Bayden administratsiyasining ismini oshkor etmagan vakiliga tayanib, The New York Times xabar berdi.
Nashr manbasiga ko‘ra, tanklarni yetkazib berish ishlari tez kunlarda boshlanadi. Biroq u Ukrainaga ushbu zirhli texnikalar qaysi mamlakatlardan va qancha yuborilishini oshkor etmagan.
AQSH buni prezident Vladimir Zelenskiyning iltimosiga ko‘ra amalga oshirmoqda, chunki avvalroq Ukraina yetakchisi NATOga a’zo davlatlardan tank va harbiy samolyotlar so‘ragandi. Zelenskiy G‘arbni qurol-yarog‘ yetkazib berish masalasidagi “sansalorlik” harakatini tandiq qilgan.
Bu AQSHning, Rossiya Ukrainaga hujum boshlaganida beri, ukraina qo‘shinlariga tanklarni bevosita birinchi marta yetkazib berishi hisoblanadi. AQSH hukumati bundan oldin Ukrainaga mudofaa maqsadlari uchun mo‘ljallangan qurollarni topshirib kelayotgandi.
1-aprel kuni AQSH Mudofaa vazirligi Qo‘shma Shtatlar Ukrainaga harbiy yordam uchun qo‘shimcha 300 million dollar ajratilishini ma’lum qildi. Pentagon matbuot kotibi Jon Kirbining aytishicha, yordam paketidan lazerli kuzatuvga ega raketa tizimlari, Switchblade va Puma dronlari o‘rin oladi.
Pentagon ma’lumotlariga ko‘ra, Jo Bayden AQSH prezidenti lavozimiga kirishganidan buyon Ukrainaga harbiy yordam sifatida 2,3 milliard dollar ajratilgan, buning 1,6 milliard dollari — Rossiya Ukrainaga hujum boshlaganidan so‘ng.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)