AQSH Rossiya biologik yoki kimyoviy qurol qo‘llashi mumkinligi sabab Ukrainaga aslaha-anjomlarni yetkazib bermoqda. Bu haqda Oq uy rasmiy vakili Jen Psaki ma’lum qildi.
“Ukrainalik sheriklarimizga yordam berish uchun AQSH hukumati Ukraina hukumatiga himoya vositalari va asbob-anjomlarni taqdim etmoqda”, — deydi Psaki.
Germaniya kansleri Olaf Shols Rossiya Ukrainada biologik yoki kimyoviy qurollarni ishlatsa, “dramatik choralar” haqida ogohlantirgan edi.
6-mart kuni Rossiya Mudofaa vazirligi Ukrainada biologik qurol komponentlari yaratilayotgani aytilgan hujjatlarni e’lon qilgandi. Idora rasmiy vakili general-mayor Igor Konashenkovning so‘zlariga ko‘ra, shundan so‘ng “Ukraina Sog‘liqni saqlash vazirligi barcha biolaboratoriyalarga xavfli patogenlar saqlanadigan zaxiralarini zudlik bilan yo‘q qilish bo‘yicha ko‘rsatma yuborgan”.
16-mart kuni Rossiya prezidenti Vladimir Putin Ukrainada bevosita Rossiya chegarasi yaqinida biologik qurol komponentlari yaratilganini ma’lum qildi. Uning so‘zlariga ko‘ra, Pentagon rahbarligi va moliyaviy ko‘magida o‘nlab laboratoriyalar tarmog‘i “harbiy-biologik dasturlar, jumladan, koronavirus, Sibir kuydirgisi, Afrika cho‘chqa o‘lati va boshqa halokatli kasalliklar namunalari bilan tajribalar o‘tkazgan”.
AQSH davlat kotibi o‘rinbosari Viktoriya Nuland Senatdagi eshituvda Ukrainada biologik tadqiqot obyektlari bo‘lganini tasdiqlagan. U mazkur tadqiqotlar haqida hech qanday batafsil ma’lumotlarni keltirmagan. Pentagon va Oq uy esa bu ma’lumotlarni rad etgan. BMT Ukrainada ishlagan JSST xodimlarining bunday tadqiqotlardan xabari yo‘qligini ma’lum qilgan.
Izoh (0)