Rossiyada kamida 300 nafar suriyalik harbiy xizmatchi Ukrainaga yuborilishdan oldin tayyorgarlik o‘tamoqda. Bu haqda o‘z manbasiga tayanib, The New York Times xabar berdi.
Gap Suriya urushi davrida rossiyalik harbiylar bilan hamkorlik qilgan Suriya armiyasi bo‘linmasining askarlari haqida ketmoqda.
Ukrainaga yuborish uchun Suriyadagi yollovchilar tomonidan tuzilgan ro‘yxatlarda allaqachon minglab ismlar bor. Maqolada ta’kidlanishicha, nomzodlar yuborilishidan oldin Suriya va Rossiya maxsus xizmatlari tomonidan tekshirilmoqda.
“So‘nggi yillarda Suriya yollanma jangchi eksportchisiga aylangan — bu urush oqibati bo‘lib, ko‘plab erkaklarda jangovar tajriba mavjud, biroq mamlakat iqtisodiyotiga shu qadar putur yetganida odamlar ish topa olmayapti. Natijada ular Liviya, Ozarbayjon, JAR va endilikda Ukrainadagi urushda yollanma jangchi sifatida yo‘l olmoqda”, — deyiladi xabarda.
Rossiya Ukrainaga suriyalik yollanma jangchilarni yuborishni rejalashtirayotgani haqida mart boshlarida ma’lum bo‘lgan. Rossiya hukumati o‘z navbatida Yaqin Sharqdan DXR va LXRga yordam berishni istayotgan 16 ming ko‘ngilli borligini ma’lum qilgan.
Avvalroq Suriyaning Deirezzor24 nashri Rossiya Suriyada yollanma askarlarni, shuningdek, obyektlarni qo‘riqlash uchun odamlarni yollayotgani haqida xabar bergandi. Qo‘riqlash uchun olti oylik ish va 200-300 dollar maosh va’da qilingan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)