Agar Janubiy Osetiya (qisman tan olingan respublika) Rossiya Federatsiyasi tarkibiga qo‘shilsa, Shimoliy Osetiya bilan birlashib, Rossiyaning yagona subyektiga aylanishi mumkin, dedi respublika prezidenti Anatoliy Bibilov.
“Biz tashlashimiz kerak bo‘lgan huquqiy qadamlar bor. Federatsiyaning bir qismiga aylangan paytimizda, Rossiya Federatsiyasi ichida subyektlarni birlashtirish bilan bog‘liq protseduralar bo‘ladi”, — dedi Bibilov “Rossiya 24” telekanaliga bergan intervyusida.
“Janubiy Osetiya Rossiya Federatsiyasi tarkibiga Rossiya subyekti sifatida kirishi mumkin. Menimcha, Osetiyani birlashtirish zarur”, — ta’kidladi Bibilov.
Ma’lumot uchun Shimoliy Osetiya— Rossiya Federatsiyasi tarkibidagi respublika.
“Ko‘pchilik rahbar, yagona subyektning prezidenti kim bo‘lishini, hukumat qayerda bo‘lishini gapirmoqda – bu texnik masalalar, ularni hal qilsa bo‘ladi va bu qarorlar muayyan kuch tuzilmalarining joylashuvi nuqtayi nazaridan mutlaqo to‘g‘ri bo‘lishi mumkin”, — dedi Bibilov. U “Osetiya, shubhasiz, birlashishi kerakligini” yana bir bor ta’kidladi.
“Janubiy Osetiya Rossiya Federatsiyasiga qo‘shilish uchun qanday qonuniy choralarni ko‘rishi kerak”, degan savolga Bibilov shunday javob berdi: “Bu qaror respublika aholisi uchun hayotiy ahamiyatga ega. Boshqa barcha qarorlar konstitutsiyada ko‘rsatilgan. Albatta, buning uchun referundum o‘tkazish, xalqning fikrini so‘rash kerak bo‘ladi”.
30-mart kuni Bibilov Janubiy Osetiya Rossiyaga qo‘shilishni rejalashtirayotgani haqida ma’lum qildi. “Rossiya bilan birlashish bizning strategik maqsadimiz, deb hisoblayman. Bizning yo‘l. Odamlarning intilishlari. Va biz bu yo‘ldan boramiz. Yaqin kunlarda tegishli qonuniy choralar ko‘ramiz. Janubiy Osetiya respublikasi o‘zining tarixiy vatani – Rossiyaning bir qismi bo‘ladi”, — dedi Bibilov.
O‘zini o‘zi respublika deb e’lon qilgan Lugansk rahbari Leonid Pasechnik 27-mart kuni yaqin orada respublikada Rossiya tarkibiga qo‘shilish bo‘yicha referendum o‘tkazilishini ma’lum qilgandi. Keyinroq u hozir hech kim referendumga tayyorgarlik ko‘rmayotgani, chunki asosiy maqsad “urushni tugatish” ekani haqida bayonot berdi.
29-mart kuni Donetsk rahbari Denis Pushilin ham Rossiyaga qo‘shilish masalasi ko‘rib chiqilishi haqida ma’lum qildi. “Ammo hozir asosiy vazifa respublikaning konstitutsiyaviy chegaralariga yetib borishdir. Qarorni keyin qabul qilamiz”, — deya qo‘shimcha qildi Pushilin.
Abxaziya parlament spikeri Valeriy Kvarchiya esa respublika Rossiya tarkibiga kirmoqchi emasligini aytdi. “Abxaziyaning Rossiya Federatsiyasi tarkibiga qo‘shilishi haqida gap yo‘q. Abxaziya konstitutsiyasida mamlakatimiz mustaqil davlat deb e’lon qilingan”, — deya uning so‘zlaridan iqtibos keltirgan “Interfaks”.
Izoh (0)