АҚШ президенти Жо Байден 31 мартда яқин олти ой давомида ҳар куни давлат стратегик захирасидан ўртача 1 миллион баррель нефть бозорга йўналтирилишини эълон қилди. Бу ҳақда «Интерфакс» хабар берган.
«Бугун кейинги олти ой давомида стратегик захирадан кунига 1 миллион баррель нефть ажратилишини маъқулладим», – деган Байден Оқ уйдаги баёнотида.
АҚШ давлат раҳбарининг сўзларига кўра бу мамлакат тарихида стратегик захирадан ажратиладиган энг катта ҳажмдаги нефть бўлади.
Байден журналистларнинг саволларига жавоб қайтариш вақтида администрацияси томонидан кўрилаётган чора-тадбирлар нефть нархининг тушишига қай даражада таъсир кўрсатиши борасида аниқ бир нарса дея олмаслигини таъкидлаган.
«Нархларнинг қай даражада пасайишини ҳеч ким билмайди», – деган у.
АҚШ президенти бу кўп жиҳатдан стратегик захирадан ажратиладиган нефтдан мамлакат иттифоқчиларининг фойдаланишга розилик бериш ёки бермаслигига боғлиқлигини қўшимча қилган. Байден улар билан биргаликда 30-50 миллион баррель ажратилишини тахмин қилди.
Аввалроқ Оқ уй Байденнинг ушбу ташаббус бўйича бутун дунёдаги иттифоқчилар ҳамда ҳамкорлар ишини мувофиқлаштириши ҳақида ахборот берган. Байден мазкур ташаббусга бошқа мамлакатлар ҳам қўшилиши кутилаётгани ва агар ҳаммаси режадагидек кетса бир кунда 1 миллион баррелдан кўпроқ нефть ажратиш имконияти ҳам юзага келишини таъкидлаган.
АҚШ администрацияси нефть сотувидан тушган даромад келгуси йиллар учун стратегик нефть захирасини тўплашга сарфланишини қайд этган.
АҚШ стратегик нефть захирасидан қисқа давр учун қарзга нефть оладиган ва қўшимча ҳажм билан қайтарадиган компанияларга (одатда нефтни қайта ишлайдиган корхоналар) ёнилғи алмашинуви доирасида захиранинг муайян қисмидан озод қилганди.
2022 йил март ойи бошларида захиралардан 63 миллион баррель нефть ажратилган, Халқаро энергетика агентлиги иштирокчи-мамлакатларнинг 1,5 миллиард баррель нефть захирасига эгалигини билдирган.Аввал Зеленский Байден билан Киев ва Москва ўртасидаги музокараларнинг бориши ҳақида фикр алмашгани, Оқ уй Путин ва Байден қачон учрашиши мумкинлигини маълум қилгани, Байден АҚШнинг Украинага мудофаа учун кўмак беришда давом этишини қайд этгани ҳақида хабарлар берилган.
Изоҳ (0)