Andijonda 25 yillik daraxtlar o‘rnida 480 o‘rinli ixtisoslashtirilgan maktab quriladi. Bu haqda viloyat hokimi Shuhrat Abdurahmonov 2022-yilning 20-mart kuni qaror qabul qilgan, deya xabar berdi “Daryo” muxbiri.
Maktab aynan qaysi obyekt o‘rnida qurilish aytilmagan bo‘lsa-da, maktab qurilishining bosh reja ko‘chirmasida uning Cho‘lpon bog‘i joylashgan hududdan qurilishi anglashiladi. Shuningdek, Andijon shahar hokimligi axborot xizmati ham ushbu taxminni tasdiqlagan.
“Daryo” muxbirining aniqlashtirishicha, mazkur hujjat prezidentning 2021-yil 19-iyuldagi “Prezident, ijod va ixtisoslashtirilgan maktablar faoliyatini yanada takomillashtirish bo‘yicha qo‘shimcha chora-tadbirlar to‘g‘risida”gi hamda 2022-yil 22-yanvardagi “2022—2024-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi qarorlari ijrosini ta’minlash maqsadida qabul qilingan.
Viloyatdagi Abdulhamid Cho‘lpon nomidagi madaniyat va istirohat bog‘i Vazirlar Mahkamasining 1997-yil 21-fevraldagi “Abdulhamid Sulaymon o‘g‘li cho‘lpon tavalludining 100 yilligini nishonlash to‘g‘risida”gi qaroriga asosan tashkil etilgan. Bog‘da yodgorlik muzeyi joylashgan bo‘lib, muzey ekspozitsiyasida Cho‘lponning xayoti va faoliyati eksponatlar orqali yoritib berilgan. Bog‘ning kirish qismida adibga yodgorlik o‘rnatilgan. Ayni paytda bog‘da davlat fondiga kirmaydigan 100 ga yaqin daraxt va butalar bo‘lib, har biri 25 yil avval ekilgan.
Andijon shahar hokimligi axborot xizmatining ma’lumot berishicha, maktab qurilishi aprel oyida boshlanadi. Bog‘dagi daraxtlar kesilmasdan boshqa joyga ko‘chirilishi, yangi bino atroflariga esa yosh nihollarning ekilishi bildirilgan.
Izoh (0)