Андижонда 25 йиллик дарахтлар ўрнида 480 ўринли ихтисослаштирилган мактаб қурилади. Бу ҳақда вилоят ҳокими Шуҳрат Абдураҳмонов 2022 йилнинг 20 март куни қарор қабул қилган, дея хабар берди «Дарё» мухбири.
Мактаб айнан қайси объект ўрнида қурилиш айтилмаган бўлса-да, мактаб қурилишининг бош режа кўчирмасида унинг Чўлпон боғи жойлашган ҳудуддан қурилиши англашилади. Шунингдек, Андижон шаҳар ҳокимлиги ахборот хизмати ҳам ушбу тахминни тасдиқлаган.
«Дарё» мухбирининг аниқлаштиришича, мазкур ҳужжат президентнинг 2021 йил 19 июлдаги «Президент, ижод ва ихтисослаштирилган мактаблар фаолиятини янада такомиллаштириш бўйича қўшимча чора-тадбирлар тўғрисида»ги ҳамда 2022 йил 22 январдаги «2022—2024 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги қарорлари ижросини таъминлаш мақсадида қабул қилинган.
Вилоятдаги Абдулҳамид Чўлпон номидаги маданият ва истироҳат боғи Вазирлар Маҳкамасининг 1997 йил 21 февралдаги «Абдулҳамид Сулаймон ўғли чўлпон таваллудининг 100 йиллигини нишонлаш тўғрисида»ги қарорига асосан ташкил этилган. Боғда ёдгорлик музейи жойлашган бўлиб, музей экспозициясида Чўлпоннинг хаёти ва фаолияти экспонатлар орқали ёритиб берилган. Боғнинг кириш қисмида адибга ёдгорлик ўрнатилган. Айни пайтда боғда давлат фондига кирмайдиган 100 га яқин дарахт ва буталар бўлиб, ҳар бири 25 йил аввал экилган.
Андижон шаҳар ҳокимлиги ахборот хизматининг маълумот беришича, мактаб қурилиши апрель ойида бошланади. Боғдаги дарахтлар кесилмасдан бошқа жойга кўчирилиши, янги бино атрофларига эса ёш ниҳолларнинг экилиши билдирилган.
Изоҳ (0)