Xorazm viloyatida joylashgan “Yangiariq” poligonida O‘zbekiston va Hindiston harbiy xizmatchilari ishtirokida “Do‘stlik—2022” qo‘shma taktik o‘quv mashg‘ulotlari bo‘lib o‘tdi. Bu haqda Mudofaa vazirligi Axborot va ommaviy kommunikatsiyalar departamenti xabar berdi.
O‘zbek—hind hamkorlikdagi maxsus-taktik o‘quvining asosiy kuniga qadar birgalikdagi o‘quvning g‘oyasi, cho‘l sharoitida razvedka qidiruv harakatlarini olib borishning o‘ziga xos xususiyatlari, shartli dushmanni qurshab olish va yakson qilishda bo‘linmalar bajaradigan vazifalarga oydinlik kiritilgan. O‘quv rejasiga ko‘ra, uning asosiy qismi chegara naryadining muhim ma’lumotlarni yetkazishi bilan boshlangan. Unda shartli terroristik guruhlar tomonidan davlat chegarasini buzib o‘tilishi hamda g‘arazli niyatlarini amalga oshirilishi bo‘yicha harakatlar bajarilgan.
Mashg‘ulotni Shimoli-g‘arbiy harbiy okrug qo‘shinlari qo‘mondoni polkovnik Farhodjon Shermatov, Hindiston Qurolli Kuchlari piyoda qo‘shinlari brigada generali Dipak Sharma, Hindistonning O‘zbekistondagi harbiy attashesi polkovnik Nipun Anand hamda davlat va jamoat vakillari kuzatib borgan.
Yuzaga kelgan vaziyatdan kelib chiqib, hamkorlikda operativ shtab hamda yig‘ma otryad tashkil etilib, o‘zbek—hind hamkorlikdagi kuchlari belgilangan hududda jangovar vazifani bajarishga kirishgan. O‘quv mashg‘uloti davomida razvedka-qidiruv ishlari olib borilishi natijasida aholi yashash punktida noqonuniy qurollangan shaxslar harakati aniqlandi. Zarba-ishg‘ol bo‘linmalari va ularning soni, tarkibi va qo‘riqlov tizimini aniqlash maqsadida hududda tun-u kun kuzatuv olib borilgan.
Shundan so‘ng hamkorlikdagi antiterror operatsiyasini o‘tkazishga kirishilgan. Shartli dushmanning tirik kuchlari jangovar guruhlarning ishg‘ol harakatlari natijasida yo‘q qilingan.
Uchinchi bosqichda O‘zbekiston Mudofaa vazirligining jangovar vertolyotlari juftligi shartli dushman harakat qilayotgan texnika va tirik kuchiga havodan zarba bergan. Shu bilan uchinchi bor o‘tkazilgan “Do‘stlik—2022” o‘zbek—hind qo‘shma taktik o‘quv mashg‘ulotlari muvaffaqiyatli yakunlangan. O‘quvning yopilish marosimida faol ishtirok etgan harbiy xizmatchilar munosib taqdirlangan.
Avvalroq O‘zbekiston razvedkachilari Pokistonda o‘tkazilgan xalqaro musobaqada rekord natija bilan g‘olib bo‘lgani, O‘zbekiston Qozog‘iston bilan hamkorlikda “Termiz” poligonida harbiy mashg‘ulotlar o‘tkazgani to‘g‘risida xabar berilgandi.
Izoh (0)