Putin Ukraina bilan urushga qarshi chiqqan to‘rt olimni Rossiya Xavfsizlik kengashi qoshidagi ilmiy kengashdan chiqarib tashladi

Rossiya prezidenti Vladimir Putin Rossiya Xavfsizlik kengashi qoshidagi ilmiy kengashdan to‘rt nafar ekspertni chiqarib yubordi. Bu haqda Putinning 28-martdagi qaroriga tayanib, Meduza xabar berdi.

Kengash tarkibidan quyidagi olimlar chiqarilgan:

• Aleksey Gromiko — Rossiya Fanlar akademiyasining Yevropa instituti direktori;
• Aleksandr Nikitin — Rossiya Tashqi ishlar vazirligining Moskva xalqaro munosabatlar davlat instituti va Yevro-Atlantika xavfsizligi markazi direktori;
• Aleksandr Panov — Rossiya Fanlar akademiyasining AQSH va Kanada instituti bosh ilmiy xodimi;
• Sergey Rogov — Rossiya Fanlar akademiyasining AQSH va Kanada instituti ilmiy direktori.

Mart oyi boshida ushbu to‘rt nafar olim ham AQSh va Yevropa davlatlaridagi hamkasblari bilan birgalikda “Ikkinchi jahon urushidan keyin Yevropa qit’asidagi eng yirik inqirozdan o‘ta xavotir bildirilgan” bayonotni imzolagandi. Murojaat mualliflari nizo tomonlarini o‘t ochishni to‘xtatishga, gumanitar masalalarda hamkorlikni yo‘lga qo‘yishga, yadroviy ritorikadan tiyilishga, bir tomondan AQSH va NATO, ikkinchi tomondan Rossiya va boshqalar o‘rtasida harbiy hodisalarning oldini olish bo‘yicha qo‘shimcha chora-tadbirlar to‘g‘risida kelishib olishga chaqirgandi.

Aleksey Gromiko RTVIga o‘zi va boshqa ekspertlar Xavfsizlik kengashi a’zoligidan nega chiqarib yuborilganini bilmasligini aytdi hamda rasmiylar ularning tavsiyalariga quloq solmaganini qayd etdi.

“O‘sha kunlarda mazkur bayonot mamlakatimizning milliy manfaatlari nuqtai nazaridan katta ma’noga ega edi”, — dedi u.