Путин Украина билан урушга қарши чиққан тўрт олимни Россия Хавфсизлик кенгаши қошидаги илмий кенгашдан чиқариб ташлади

Россия президенти Владимир Путин Россия Хавфсизлик кенгаши қошидаги илмий кенгашдан тўрт нафар экспертни чиқариб юборди. Бу ҳақда Путиннинг 28 мартдаги қарорига таяниб, Meduza хабар берди.

Кенгаш таркибидан қуйидаги олимлар чиқарилган:

• Алексей Громико — Россия Фанлар академиясининг Европа институти директори;
• Александр Никитин — Россия Ташқи ишлар вазирлигининг Москва халқаро муносабатлар давлат институти ва Евро-Атлантика хавфсизлиги маркази директори;
• Александр Панов — Россия Фанлар академиясининг АҚШ ва Канада институти бош илмий ходими;
• Сергей Рогов — Россия Фанлар академиясининг АҚШ ва Канада институти илмий директори.

Март ойи бошида ушбу тўрт нафар олим ҳам АҚШ ва Европа давлатларидаги ҳамкасблари билан биргаликда «Иккинчи жаҳон урушидан кейин Европа қитъасидаги энг йирик инқироздан ўта хавотир билдирилган» баёнотни имзолаганди. Мурожаат муаллифлари низо томонларини ўт очишни тўхтатишга, гуманитар масалаларда ҳамкорликни йўлга қўйишга, ядровий риторикадан тийилишга, бир томондан АҚШ ва НАТО, иккинчи томондан Россия ва бошқалар ўртасида ҳарбий ҳодисаларнинг олдини олиш бўйича қўшимча чора-тадбирлар тўғрисида келишиб олишга чақирганди.

Алексей Громико РTВИга ўзи ва бошқа экспертлар Хавфсизлик кенгаши аъзолигидан нега чиқариб юборилганини билмаслигини айтди ҳамда расмийлар уларнинг тавсияларига қулоқ солмаганини қайд этди.

«Ўша кунларда мазкур баёнот мамлакатимизнинг миллий манфаатлари нуқтаи назаридан катта маънога эга эди», — деди у.