Qozog‘iston Favqulodda vaziyatlar vazirligining qutqaruvchilari o‘tgan sutka davomida noqulay ob-havo tufayli favqulodda vaziyatga tushib qolgan 372 kishini, jumladan, 312 nafar bolani evakuatsiya qildi. Oqmola, Qarag‘anda, Pavlodar va Qo‘stanay viloyatlaridagi nazorat-o‘tkazish punktlarida 1,5 mingga yaqin avtomashinalar harakati to‘xtatildi, o‘nlab odamlar issiqlik punktlariga joylashtirildi, deb xabar bermoqda FVV matbuot markazi.
“Ayni paytda Aqmola, Olmaota, Aqto‘be, Sharqiy Qozog‘iston, Qarag‘anda, Qo‘stanay, Pavlodar, Shimoliy Qozog‘iston viloyatlarida 111 ta yo‘l uchastkasi yopilgan, shundan 52 tasi respublika, 59 tasi viloyat ahamiyatiga ega. Yo‘llarning yopiq uchastkalarida aholini evakuatsiya qilish uchun 40 ta vaqtinchalik isitish punktlari tayyorlandi. Yo‘l xizmatlari qorni tozalash ishlarini olib bormoqda”, — deyiladi vazirlik xabarida.
Qayd etilishicha, Qozog‘istonning ko‘plab viloyatlarida ikki kundan buyon kuchli shamol esmoqda, qor yog‘moqda, ba’zi joylarda qor bo‘roni kuzatilmoqda. Shamol tomlarni yirtib uchirib, daraxtlarni qulatmoqda, mahalliy elektr ta’minotida uzilishlar sodir bo‘lmoqda. Nur-Sulton, Olmaota shahri va Olmaota viloyatida yuz bergan tabiiy ofat natijasida 6 kishi, jumladan, uch bola jabrlangan. Olmaotada qulagan daraxtlar 25 ta mashinaga zarar yetkazgan.
29-mart kuni qor yog‘ishi va atrofni ko‘rishning yomonlashuvi sababli Nur-Sulton aeroporti faoliyati to‘xtatildi. Bugun, 30-mart kuni aeroport samolyotlarni qabul qilish va jo‘natishni qayta boshladi, biroq o‘nlab reyslar kechiktirildi. Ijtimoiy tarmoqlarda Olmaota aeroportida kuchli shamol SCAT aviakompaniyasining Boeing-737 samolyotini qanday burib yuborgani aks etgan video tarqaldi.
Noqulay ob-havo munosabati bilan respublika Favqulodda vaziyatlar vazirligida qator hududlardagi bo‘linmalari bilan tezkor shtab tuzilib, ishonch telefoni tashkil etildi. Mamlakat bo‘ylab qutqaruv ishlariga Favqulodda vaziyatlar va Ichki ishlar vazirliklarining 550 nafarga yaqin xodimi, yuzlab texnikalar jalb etilgan.
“Qazgidromet”ning xabar berishicha, 30-mart kuni Chimkentdan tashqari, Qozog‘istonning barcha hududlarida bo‘ron va yog‘ingarchilik (qor, yomg‘ir) davom etadi, shamol 15-20 metr / sekundgacha kuchayadi. FVV fuqarolarni zarur ehtiyot choralarini ko‘rishga — aholi punktlari o‘rtasida harakatlanishni cheklashga, daraxtlar va beqaror inshootlardan uzoqroq turishga chaqirdi.
Izoh (0)