Rossiya va AQSH prezidentlari Ukrainadagi keskinlik pasaytirilgan taqdirdagina uchrashishi mumkin. Bu haqda Oq uyning kommunikatsiyalar bo‘yicha direktori Keyt Bedingfild brifingda ma’lum qildi.
Uning so‘zlariga ko‘ra, Bayden Putin bilan muzokaralar unda nima muhokama qilinishidan kelib chiqib, o‘tkazilishini aytgan. Bedingfild biror-bir shart qo‘yishdan bosh tortgan.
“Prezident Bayden suhbat amalga oshishdan oldin Rossiya tomonidan deeskalatsiya va diplomatiyaga sodiqlik bo‘lishi kerakligini ma’lum qilgan”, — deydi Oq uy vakili.
Avvalroq Amerika yetakchisi Putin bilan uchrashuvni istisno etmagan, biroq u uchrashuv suhbat nima haqida bo‘lishiga bog‘liqligini ta’kidlagan. “Ushbu urushni tugatadigan va Ukrainani qayta tiklash imkonini beradigan asoslar bo‘lishi kerak”, — degan u.
2021-yilning iyulida Jenevada Putin va Bayden o‘rtasida muzokaralar o‘tkazilgandi. Dekabr oyida davlat rahbarlari videokonferensiya formatida muloqot qilgan. Bundan tashqari, ular bir necha bor telefon orqali suhbatlashgan. Oxirgi marta prezidentlar 12-fevral kuni qo‘ng‘iroqlashishgan edi.
Rossiya tomonidan Ukrainada harbiy operatsiyalar boshlangach, Bayden rossiyalik hamkasbini bir necha bor haqorat qildi. Xususan, 17-mart kuni Jo Bayden Vladimir Putinni “qonli diktator va Ukraina xalqiga qarshi axloqsiz urush olib borayotgan haqiqiy kallakesar” deb atadi. Undan avval, 16-mart kuni esa Bayden Rossiya prezidentini harbiy jinoyatchi deb atagandi. Dmitriy Peskov AQSH davlat rahbarining “Putinni harbiy jinoyatchi” deb atagan bayonoti “o‘rinsiz va kechirib bo‘lmaydigan nutqdan” boshqa narsa emasligini aytgan.
Eslatib o‘tamiz, bir yil oldin Bayden Putinni “qotil deb hisoblaysizmi?” degan savolga ijobiy javob bergandi.
Izoh (0)