BMT Rossiya va Ukrainani asirlarga nisbatan zo‘ravonlik holatlari aks etgan videolarni tekshirishga chaqirdi

Birlashgan Millatlar Tashkilotining Ukrainadagi Inson huquqlari monitoringi missiyasi rahbari Matilda Bogner ham Rossiya, ham Ukraina rasmiylarini mahbuslarga nisbatan zo‘ravonlik holatlarini tekshirishga chaqirdi, deb xabar bermoqda CNN.

“Biz Rossiya tomonidan asirga olingan ukrainalik harbiy asirlarning ham, Ukraina tomonidan qo‘lga olingan rossiyalik harbiy asirlarning ham videolarini ko‘rdik”, — dedi Bogner 28-mart kuni bo‘lib o‘tgan brifingda.

Uning so‘zlariga ko‘ra, BMT ushbu videolarni tekshirish jarayonida, ammo ularda aks etgan voqealar jiddiy xavotir uyg‘otmoqda. BMT mojaroning har ikki tomoni sodir bo‘lgan voqeani chuqur o‘rganib, aybdorlarni javobgarlikka tortishiga umid qilmoqda.

27-mart kuni ukrainalik askarlar asirdagi rossiyalik askarlarning oyoqlariga o‘q uzgani haqida video tarqaldi. Video qachon va qayerda suratga olingani noma’lum.

Ukraina prezident ofisi rahbarining maslahatchisi Aleksey Arestovich videoda sodir bo‘layotgan voqealarda “harbiy jinoyat alomatlari borligini” va “jiddiy tergov” o‘tkazilishini aytdi. Shu bilan birga, Ukraina Qurolli kuchlari bosh qo‘mondoni Valeriy Zalujniyning aytishicha, internetda go‘yoki rossiyalik mahbuslarga zo‘ravonlik qilinayotgani aks etgan feyk videolar tarqalmoqda. Rossiya Tergov qo‘mitasi rahbari Aleksandr Bastrikin “ukrainalik millatchilarning asirga olingan harbiy xizmatchilarga nisbatan shafqatsiz munosabatda bo‘lishi”ga oid barcha holatlarni aniqlashni buyurdi.

Ushbu video eng ko‘p muhokamaga sabab bo‘ldi, ammo bu Ukraina va Rossiya tomonlari bir-birini mahbuslarga nisbatan yomon munosabatda bo‘lganlikda ayblagan yagona holat emas.