Rossiya prezidenti va mamlakat oliy bosh qo‘mondoni Vladimir Putin Ramzan Qodirovga general-leytenant harbiy unvonini berdi. Bu haqda Checheniston hududiy parlamenti spikeri Magomed Daudov “VKontakte”dagi sahifasida ma’lum qilgan.
“Checheniston respublikasi rahbari, Rossiya qahramoni Ramzan Ahmatovich Qodirovni Rossiya prezidenti, oliy bosh qo‘mondoni Vladimir Vladimirovich Putin tomonidan general-leytenant harbiy unvoni berilgani bilan tabriklayman”, — deb yozgan Daudov.
Checheniston parlamentining spikeri prezidentning bu boradagi tegishli farmonini o‘z postiga ilova qilmagan, Kreml rasmiy saytida ham ushbu hujjat hali e’lon qilingani yo‘q.
Ramzan Qodirov 45 yoshda. U 2007-yil fevral oyidan beri Chechenistonga rahbarlik qilib kelmoqda va Rossiya federal hududlari orasida bir respublikani eng ko‘p boshqargan yetakchi hisoblanadi.
Checheniston rahbari 2020-yil iyul oyida Rossiya gvardiyasining general-mayori unvoniga loyiq ko‘rilgandi. Bundan tashqari, u mamlakatdagi eng oliy unvoni Rossiya Federatsiyasi qahramoni bo‘lgan, shuningdek “Vatan oldidagi xizmatlari uchun” III darajali ordeni, “Jasorat” ordeni, “Sharaf” ordeni va boshqa davlat mukofotlarining egasi hisoblanadi.
2020-yil yakunlariga ko‘ra, Qodirov eng boy Rossiya gubernatori deb topilgan: u bir yil ichida 381,19 million rubl ishlab olgan. Oxirgi ikki yilda Checheniston rahbarining daromadi 50 baravarga oshgan: u 2018-yilda 7,5 million rublni deklaratsiya qilgan bo‘lsa, 2019-yilda ushbu mablag‘ 148 million rublga yetgan.
Izoh (0)