Бирлашган Миллатлар Ташкилотининг Украинадаги Инсон ҳуқуқлари мониторинги миссияси раҳбари Матилда Богнер ҳам Россия, ҳам Украина расмийларини маҳбусларга нисбатан зўравонлик ҳолатларини текширишга чақирди, деб хабар бермоқда CNN.
«Биз Россия томонидан асирга олинган украиналик ҳарбий асирларнинг ҳам, Украина томонидан қўлга олинган россиялик ҳарбий асирларнинг ҳам видеоларини кўрдик», — деди Богнер 28 март куни бўлиб ўтган брифингда.
Унинг сўзларига кўра, БМТ ушбу видеоларни текшириш жараёнида, аммо уларда акс этган воқеалар жиддий хавотир уйғотмоқда. БМТ можаронинг ҳар икки томони содир бўлган воқеани чуқур ўрганиб, айбдорларни жавобгарликка тортишига умид қилмоқда.
27 март куни украиналик аскарлар асирдаги россиялик аскарларнинг оёқларига ўқ узгани ҳақида видео тарқалди. Видео қачон ва қаерда суратга олингани номаълум.
Украина президент офиси раҳбарининг маслаҳатчиси Алексей Арестович видеода содир бўлаётган воқеаларда «ҳарбий жиноят аломатлари борлигини» ва «жиддий тергов» ўтказилишини айтди. Шу билан бирга, Украина Қуролли кучлари бош қўмондони Валерий Залужнийнинг айтишича, интернетда гўёки россиялик маҳбусларга зўравонлик қилинаётгани акс этган фейк видеолар тарқалмоқда. Россия Тергов қўмитаси раҳбари Александр Бастрикин «украиналик миллатчиларнинг асирга олинган ҳарбий хизматчиларга нисбатан шафқатсиз муносабатда бўлиши»га оид барча ҳолатларни аниқлашни буюрди.
Ушбу видео энг кўп муҳокамага сабаб бўлди, аммо бу Украина ва Россия томонлари бир-бирини маҳбусларга нисбатан ёмон муносабатда бўлганликда айблаган ягона ҳолат эмас.
Мавзуга доир:
- Мелитопол мери Россия ҳарбийларининг қўлида асирликдаги вақти ҳақида гапирди. У тергов изоляторида ушлаб турилган ва «саводсизларча ёзилган» ҳужжатларни имзолашга мажбур қилинган
- Украинада россиялик ҳарбий асирлар учун лагерлар ташкил этилди. Мамлакатда камида 562 нафар асир бор
- Россиялик сиёсатчи ва маданият арбоблари Украина билан «ҳаммасига ҳамма» тамойили асосида асирлар ва қурбонларни алмашишга чақирмоқда
Изоҳ (0)