“Ibn Sino” jamoat fondining tamakiga qarshi kurashish bo‘yicha eksperti Shuhrat Shukurov O‘zbekistonda jamoat joylarida tamaki chekishni cheklovchi qonun borligini, ammo qonun ishlamayotgani bois, tamaki chekishga qarshi kurash natija bermayotganini aytdi. Bu haqda Oliy Majlis huzuridagi NNT va fuqarolik jamiyatining boshqa institutlarini qo‘llab-quvvatlash jamoat fondi va “Ibn Sino” jamoat fondi tashabbusi bilan tashkil etilgan seminar-treningda ma’lum qildindi, deya xabar berdi “Daryo” muxbiri Laylo Hayitova.
Ma’lum bo‘lishicha, O‘zbekiston jurnalistlarini qayta tayyorlash markazi, Sog‘liqni saqlash vazirligining Aholining sog‘lom turmush tarzi va jismoniy faolligini oshirishni qo‘llab-quvvatlash markazi va Jahon sog‘liqni saqlash tashkiloti hamkorligida OAV vakillari uchun “Tamakisiz kelajak sari” deb nomalangan seminar-trening tashkil etilgan. Unda O‘zbekistonda tamakiga qarshi kurash bo‘yicha targ‘ibotlar olib borilsa-da, bu borada qonunlar ishlamayotgani xususida so‘z borgan.
“Keyingi paytlarda tamaki chekishga ruju qo‘yish va qiziqish oshib bormoqda. Ayniqsa, tutuni xushbo‘y hid taratuvchi elektron tamakiga bo‘lgan qiziqish juda kuchli. Shu sabab jamoat joylarida tamaki chekilayotganiga, uning odamlar sog‘ligi va atrof-muhit ozodaligiga ziyon yetkazayotganiga guvoh bo‘lyapmiz. Bu O‘zbekistonda qonunlarning ishlamayotganidan darak beradi. Ishlamaydigan qonunlar bilan esa tamakiga qarshi kurashish qiyin”, — dedi “Ibn Sino” jamoat fondining Tamakiga qarshi kurashish bo‘yicha eksperti Shuhrat Shukurov.
Ekspert so‘ziga ko‘ra, O‘zbekistonda tamaki iste’mol qilishni qisqartirish bo‘yicha choralar ko‘rilmoqda.
“Buning uchun, avvalo, tamakiga qarshi qonunchilikni takomillashtirish talab etiladi. Ayni paytda ‘Alkogol va tamaki mahsulotlarini tarqatish va iste’mol qilishni cheklash to‘g‘risida’gi yangi qonun loyihasini ilgari suryapmiz. Bu qonun 2021-yil 21-dekabr kuni Oliy Majlis Qonunchilik palatasi tomonidan qabul qilingan. Endilikda Senat tomonidan ko‘rib chiqilmoqda. Senat ma’qullasa, bu aholi o‘rtasida tamaki mahsulotlari iste’mol qilinishiga qarshi kurashda katta samara beradi”, — dedi Shuhrat Shukurov.
JSST ma’lumotlariga ko‘ra, tamakidan har yili butun dunyo bo‘yicha 8 milliondan ortiq odam aziyat chekadi. 7 milliondan ortiq o‘lim holatiga tamaki iste’mol qilish sabab bo‘lmoqda.
“Shaxsan men 37 yil tamaki chekib kelganman. Chekishni tashlaganimga 10 yil bo‘ldi. Uni bir kunda tashlaganman. Demak, agar odam istasa, tamaki chekishni bir kunda tashlashi mumkin. Faqat buning uchun kuchli targ‘ibot ishlarini olib borish kerak. Biroq bizda, umuman, targ‘ibot ishlari olib borilmaydi”, — dedi tadbirda so‘z olgan Respublika ixtisoslashtirilgan ankologiya va radiokologiya ilmiy-amaliy markazi direktori Mirzag‘olib Tillashayxov.
Seminarda, shuningdek, odamlar o‘rtasida tamakidan tashqari nosvoy chekishga ham ruju qo‘yish holati ko‘paygani aytib o‘tildi.
“Nosvoy — aholi tomonidan hech qanday qonun-qoidaga rioya etilmagan na me’yori, na tarkibi, o‘lchamli bo‘lmagan qo‘lbola tartibda va antisanitar holatda ishlab chiqiladigan, sotuvga chiqariladigan chekish vositasi. Nosvoy sotilishi cheklanmasligining asosiy sababi, istaymizmi-yo‘qmi, bu mahsulotga talab katta. Taqiq yoki cheklovlar qo‘yilishi aholining noroziligi va qarshiligiga olib keladi. Shu bois, nosvoyning tayyorlanishini tartibga solish bo‘yicha amallar belgilanishi kerak”, — dedi Shuhrat Shukurov.
Mavzuga doir:
Izoh (0)