“O‘zgidromet” 1-aprelgacha qanday ob-havo bo‘lishini ma’lum qildi.
Qayd etilishicha, 28-mart, dushanba kuni hududlarning katta qismida quruq va nisbatan iliq ob-havo bo‘lishi kutilmoqda. Kunduz kuni havo 15-17 daraja iliqqacha, janubda 20-22 daraja iliqqacha isiydi. Faqat respublikaning shimoliy hududlariga Volga bo‘yi hududlaridan sovuq antisiklon kirib kelishi boshlanadi. Qoraqalpog‘istonda va Xorazm viloyatida ba’zi joylarda yomg‘ir yog‘adi, shamol tezligi 18-23 metr/sekundgacha kuchayadi.
Dushanba kuni kechga tomon va seshanba kuni antisiklon kirib kelishi O‘zbekistonning barcha hududlariga tarqaladi. Respublika hududlari bo‘yicha (shimol va chekka janubdan tashqari) ba’zi joylarda biroz yomg‘ir yog‘adi, tog‘oldi va tog‘li hududlarda ham yog‘ingarchilik (yomg‘ir, qor) bo‘ladi. Ayrim joylarda shamol tezligi 18-23 metr/sekundgacha kuchayishi kutilmoqda. Sovuq front o‘tishida kunduzi harorat 7-10 darajagacha pasayadi.
30-martdan 1-aprelgacha O‘zbekiston bo‘yicha yog‘ingarchilik kutilmaydi, kechasi va ertalab ba’zi joylarga tuman tushishi mumkin. 30-martda havo harorati kechasi 0-3 daraja iliq, ba’zi joylarda 2 daraja sovuqqacha, kunduzi 12-17 daraja iliq atrofida bo‘ladi. Hafta oxiriga kelib kechasi harorat 5-10 daraja iliqqacha ko‘tariladi, kunduzi havo 17-22 daraja iliqqacha, janubda 23-25 daraja iliqqacha isiydi.
Tog‘li hududlarda qor ko‘chishi xavfi saqlanib turadi.
Izoh (0)