Chilonzor tumani hokimligi ko‘p qavatli uydagi mozaika bo‘yalganiga munosabat bildirdi

Ijtimoiy tarmoqlarda Chilonzor tumanidagi “Katta Olmazor” mahallasida joylashgan ko‘p qavatli uylarning fasad qismidagi bezakli kafellarning usti bo‘yalayotgani haqidagi e’tirozli fikrlar tarqaldi. Tuman hokimligi matbuot xizmati holatga munosabat bildirib, kafellarni bo‘yash ishlari to‘xtatilganini ma’lum qildi.

Xabarlarda ta’kidlanishicha, aka-uka Jarskiylar tomonidan 9 qavatli uylarning fasadiga chizilgan noyob mozaikalar bo‘yab tashlanmoqda.

Chilonzor tumani hokimligining tegishli mutasaddilaridan olingan ma’lumotlarga ko‘ra, mahalladagi mazkur uylar qurilganiga 40 yildan oshgani sababli fasadlardagi mozaikalar ham ta’mirtalab ahvolga kelib qolgan. Shu bois 2022-yil 3-mart sanasidagi VI-57-50-14-0-K/22-sonli “Toshkent shahrida ta’mirlash va obodonlashtirish ishlarini amalga oshirish to‘g‘risida”gi Xalq deputatlari Toshkent shahar kengashi tomonidan qabul qilingan qaror asosida pudratchi tashkilot tomonidan mahalladagi 9 qavatli uylarning fasadlarida ta’mirlash ishlari boshlangan.

“Lekin shu yerda yashovchilarning ayrimlarida ta’mirlash ishlariga e’tiroz bo‘lgani sababli hozirda uylarning yon qismidagi kafelli mozaikalarni bo‘yash ishlari to‘xtatilgan. Uylarning old va orqa qismlaridagi fasadlarni ta’mirlash ishlari davom ettirilmoqda”, — deyiladi munosabatda.

Eslatib o‘tamiz, 2022-yilning 18-fevralida prezident Shavkat Mirziyoyev Sergeli tumanining “Do‘stlik” mahallasiga tashrifi chog‘ida ko‘p qavatli uylardan birining devoriga chizilgan “Do‘stlik ramzi” muraliga e’tibor qaratib, rang-tasvirning bunday turiga ham alohida g‘amxo‘rlik qilish zarurligini ta’kidlagandi.