Navruz Cup—2022 xalqaro turniri doirasida Namanganda bo‘lib turgan O‘zbekiston milliy jamoasi a’zolari hasharda ishtirok etdi. Bu haqda “Daryo” muxbiri Azizbek Abduvaliyev xabar bermoqda.
“Saxovat-Namangan” xayriya jamoat fondi Davlatobod tumanidagi “Yuksalish” dahasida 132 xonadonli uy-joy majmuasi barpo etmoqda. Undagi uylar boquvchisini yo‘qotgan oilalar uchun bepul taqdim etiladi. Hozirgacha bu uylarning 24 tasi egalariga topshirilgan.
O‘zbekiston milliy terma jamoasi a’zolari dastlab o‘zlarining odatiy kiyimlarini xayriya jamoat fondining “Jannatdagi 132 qasrlar” yozuvi tushirilgan futbolkalariga almashtirdi. So‘ng shu kuni hasharga chiqqan o‘nlab namanganliklar qatori savobli yumushga hissa qo‘shdi.
Shuningdek, “Saxovat-Namangan” xayriya jamoat fondi tomonidan qurib bitkazilgan uylarda istiqomat qilayotgan oilalarni yo‘qlab, bolalarga kiyimlar va futbol to‘plari taqdim etdi.
Qayd etish joizki, bu milliy terma jamoa a’zolarining Namanganda shu kabi tadbirlarda ilk bor ishtirok etishi emas. Oldinroq ular 3-sektor hududida joylashgan Namangan pedagogika kollejida yoshlar bilan uchrashib, muloqot o‘tkazgan va ularni qiziqtirgan savollarga javob berishgandi.
Izoh (0)