«Ибн Сино» жамоат фондининг тамакига қарши курашиш бўйича эксперти Шуҳрат Шукуров Ўзбекистонда жамоат жойларида тамаки чекишни чекловчи қонун борлигини, аммо қонун ишламаётгани боис, тамаки чекишга қарши кураш натижа бермаётганини айтди. Бу ҳақда Олий Мажлис ҳузуридаги ННТ ва фуқаролик жамиятининг бошқа институтларини қўллаб-қувватлаш жамоат фонди ва «Ибн Сино» жамоат фонди ташаббуси билан ташкил этилган семинар-тренингда маълум қилдинди, дея хабар берди «Дарё» мухбири Лайло Ҳайитова.
Маълум бўлишича, Ўзбекистон журналистларини қайта тайёрлаш маркази, Соғлиқни сақлаш вазирлигининг Аҳолининг соғлом турмуш тарзи ва жисмоний фаоллигини оширишни қўллаб-қувватлаш маркази ва Жаҳон соғлиқни сақлаш ташкилоти ҳамкорлигида ОАВ вакиллари учун «Тамакисиз келажак сари» деб номаланган семинар-тренинг ташкил этилган. Унда Ўзбекистонда тамакига қарши кураш бўйича тарғиботлар олиб борилса-да, бу борада қонунлар ишламаётгани хусусида сўз борган.
«Кейинги пайтларда тамаки чекишга ружу қўйиш ва қизиқиш ошиб бормоқда. Айниқса, тутуни хушбўй ҳид таратувчи электрон тамакига бўлган қизиқиш жуда кучли. Шу сабаб жамоат жойларида тамаки чекилаётганига, унинг одамлар соғлиги ва атроф-муҳит озодалигига зиён етказаётганига гувоҳ бўляпмиз. Бу Ўзбекистонда қонунларнинг ишламаётганидан дарак беради. Ишламайдиган қонунлар билан эса тамакига қарши курашиш қийин», — деди «Ибн Сино» жамоат фондининг Тамакига қарши курашиш бўйича эксперти Шуҳрат Шукуров.
Эксперт сўзига кўра, Ўзбекистонда тамаки истеъмол қилишни қисқартириш бўйича чоралар кўрилмоқда.
«Бунинг учун, аввало, тамакига қарши қонунчиликни такомиллаштириш талаб этилади. Айни пайтда ‘Алкоголь ва тамаки маҳсулотларини тарқатиш ва истеъмол қилишни чеклаш тўғрисидаъги янги қонун лойиҳасини илгари суряпмиз. Бу қонун 2021 йил 21 декабрь куни Олий Мажлис Қонунчилик палатаси томонидан қабул қилинган. Эндиликда Сенат томонидан кўриб чиқилмоқда. Сенат маъқулласа, бу аҳоли ўртасида тамаки маҳсулотлари истеъмол қилинишига қарши курашда катта самара беради», — деди Шуҳрат Шукуров.
ЖССТ маълумотларига кўра, тамакидан ҳар йили бутун дунё бўйича 8 миллиондан ортиқ одам азият чекади. 7 миллиондан ортиқ ўлим ҳолатига тамаки истеъмол қилиш сабаб бўлмоқда.
«Шахсан мен 37 йил тамаки чекиб келганман. Чекишни ташлаганимга 10 йил бўлди. Уни бир кунда ташлаганман. Демак, агар одам истаса, тамаки чекишни бир кунда ташлаши мумкин. Фақат бунинг учун кучли тарғибот ишларини олиб бориш керак. Бироқ бизда, умуман, тарғибот ишлари олиб борилмайди», — деди тадбирда сўз олган Республика ихтисослаштирилган анкология ва радиокология илмий-амалий маркази директори Мирзағолиб Тиллашайхов.
Семинарда, шунингдек, одамлар ўртасида тамакидан ташқари носвой чекишга ҳам ружу қўйиш ҳолати кўпайгани айтиб ўтилди.
«Носвой — аҳоли томонидан ҳеч қандай қонун-қоидага риоя этилмаган на меъёри, на таркиби, ўлчамли бўлмаган қўлбола тартибда ва антисанитар ҳолатда ишлаб чиқиладиган, сотувга чиқариладиган чекиш воситаси. Носвой сотилиши чекланмаслигининг асосий сабаби, истаймизми-йўқми, бу маҳсулотга талаб катта. Тақиқ ёки чекловлар қўйилиши аҳолининг норозилиги ва қаршилигига олиб келади. Шу боис, носвойнинг тайёрланишини тартибга солиш бўйича амаллар белгиланиши керак», — деди Шуҳрат Шукуров.
Изоҳ (0)