Surxondaryo viloyatining Muzrobod tumanida kredit mablag‘ini o‘zlashtirgan MCHJ rahbari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Muzrabot tuman bo‘limi tomonidan “Aloqabank”ning Surxondaryo hududiy markazi murojaatiga asosan tergovga qadar tekshiruv o‘tkazilgan. Tekshiruv davomida “T.Y.E.” MCHJ sobiq rahbari I.S. mazkur korxonaga “Aloqabank” viloyat filiali tomonidan “Qishloq xo‘jaligi mahsulotlarini eksport qilishda aylanma mablag‘ni to‘ldirish” uchun ajratilgan 220 ming dollar kredit mablag‘ini o‘zining shaxsiy ehtiyojiga ishlatib yuborib, talon-toroj qilgani aniqlangan.
Shuningdek I.S. bank filiali mas’ul shaxslari bilan til biriktirib, aslida bahosi 737,8 million so‘m bo‘lgan binoning narxini sun’iy ravishda oshirgan holda 2,5 milliard so‘mga o‘zaro kelishuv dalolatnomasiga asosan garov ta’minoti sifatida qo‘yib, bank manfaatlariga juda ko‘p miqdorda zarar yetkazgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 205-moddasi (hokimiyat yoki mansab vakolatini suiiste’mol qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Sirdaryoda o‘zgalar nomiga 1,2 mlrd so‘m kredit rasmiylashtirgan sobiq bank xodimlariga jinoyat ishi ochilgani, Zangiotada 5,9 mlrd so‘m imtiyozli kredit mablag‘larini talon-toroj qilgan rahbarlar aniqlangani to‘g‘risida xabar berilgandi.
Mavzuga doir:
- Andijonda 527 mln so‘m, Surxondaryoda esa 772 mln so‘mdan ortiq mablag‘ni o‘zlashtirgan hisobchilar aniqlandi
- Toshkentda o‘zi ishlaydigan korxonaning 160 mln so‘mdan ortiq mablag‘ini talon-toroj qilgan bosh hisobchi ushlandi
- Sirdaryo va Surxondaryoda jami 4 mlrd so‘m kredit mablag‘larini talon-toroj qilgan rahbarlar ushlandi
Izoh (0)