Rossiyada Meta kompaniyasi “ekstremistik tashkilot” sifatida tan olinganiga qaramay, rossiyaliklarning ushbu kompaniyaga tegishli Facebook va Instagram ijtimoiy tarmoqlaridan foydalanishi qoidabuzarlik hisoblanmaydi. Bu haqda Moskvadagi Tver tuman sudi qarorining 28-mart kuni e’lon qilingan asoslovchi qismida aytiladi.
Qarorda aytilishicha, Meta faoliyati faqat “Rossiya Federatsiyasi fuqarolariga qarshi zo‘ravon ekstremistik harakatlarga chaqiriqlarni o‘z ichiga olgan va konstitutsiyaviy tuzum asoslarini o‘zgartirishga qaratilgan materiallarni joylashtirish, tarqatish va bloklash choralarini ko‘rmaslik nuqtayi nazaridan” ekstremistik deb tan olingan.
Meta’ni “ekstremistik tashkilot” deb tan olish va uning Rossiyada faoliyatini taqiqlash haqidagi qaror 21-mart kuni qabul qilingan. Mamlakatda Facebook va Instagram tarmoqlari bloklandi. Ammo cheklovlar Meta kompaniyasiga tegishli bo‘lgan WhatsApp messenjeriga ta’sir qilmadi.
Meta’ni “ekstremistik tashkilot” deb topishni Rossiya Bosh prokuraturasi talab qilgan, sababi kompaniya Facebook hamda Instagram’da ayrim mamlakatlarning rossiyalik harbiylarga nisbatan tahdidlari va chorlovlarini o‘chirishni rad qilgan, shuningdek, Vladimir Putin va Aleksandr Lukashenkoga nisbatan o‘lim tilaklarini ham o‘chirmagan (14-martda Meta prezidentlarga nisbatan o‘lim tilagini yozib post qoldirishni taqiqlagandi).
Izoh (0)