Гродно вилояти судида Беларусда Nexta мухолифатчи Telegram каналининг собиқ бош муҳаррири Роман Протасевич билан ҳибсга олинган россиялик Софя Сапега ишини кўриб чиқиш бошланди, деб хабар беради «Зеркало».
Сапегага нисбатан Жиноят кодексининг еттита моддаси бўйича айблов эълон қилинган:
- жамоат тартибини қўпол равишда бузадиган қатор ҳаракатларини ташкил этиш;
- оммавий тартибсизликларни ташкиллаштириш;
- ижтимоий нафратни юзага келтириш;
- мансабдор шахсларга нисбатан зўравонлик билан таҳдид қилиш;
- туҳмат қилиш;
- журналистлар фаолиятига тўсқинлик қилиш;
- шахсий маълумотларни ноқонуний тўплаш.
Суд жараёни ёпиқ тарзда бўлиб ўтади.
Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилганди. Самолёт йўловчилари орасида Роман Протасевич ва унинг севгилиси Софя Сапега ҳам бор эди. Улар аэропортда қўлга олинган.
Декабрь ойида Беларусь Тергов қўмитаси россиялик Софя Сапегага нисбатан ижтимоий нафрат ва нифоқни қўзғатиш моддаси бўйича якуний айблов эълон қилганди. Айбланувчининг ўгай отаси Сергей Дудич айтишича, Сапега «тергов билан келишув, Россиянинг ёрдам бериши ва экстрадицияга, иш умуман судгача бормаслигига умид қилган». Декабрь охирларида Сапега Беларусь президенти Александр Лукашенкодан афв сўраган эди.
Протасевич ҳам қўлга олинганидан кейин терговга ёрдам беришни бошлаган ва ҳукумат назорати остидаги ОАВларга интервью берганди. Ҳозирда у уй қамоғида, у интернетдан фойдаланиши мумкин, ҳозирда Протасевичга нисбатан ҳеч қандай жараён бошланмаган.
Изоҳ (0)