KXDR yetakchisi Kim Chen In tinchlikni ta’minlash va tahdidlarga qarshi turish uchun mudofaa sohasini rivojlantirish zarurligini ma’lum qildi. Bu haqda Shimoliy Koreyaning “Nodon sinmun” gazetasi xabar berdi.
Uning ta’kidlashicha, faqat keng ko‘lamli hujum imkoniyatlari himoyani ta’minlash qobiliyatiga ega. Davlat rahbari bundan keyin ham hujum uyushtirishga mo‘ljallangan qurollanishni rivojlantirishga, yanada kuchli vositalarini yaratish va ular bilan armiyani ta’minlashga va’da bergan.
Kim Chen In 25-mart kuni Hwasong-17 qit’alararo yangi ballistik raketaning uchirilishida ishtirok etgan mudofaa sanoati mutaxassislari, olimlar, muhandislar va boshqa xodimlar bilan uchrashgan. 25-mart kuni KXDR raketa davlat rahbarining shaxsiy nazorati ostida muvaffaqiyatli sinovdan o‘tkazilganini ma’lum qildi. Raketa Pxenyan aeroportidan uchirilgan. Parvozning maksimal balandligi 6248,5 kilometr, uzoqligi — 1090 kilometr.
Yonhap agentligining yozishicha, 2022-yil boshidan buyon bu KXDRning 12 marotaba raketa uchirishi hisoblanadi. Bunga qadar Seuel KXDR Sariq dengiz tomon to‘rtta reaktiv zalp o‘t ochish tizimlaridan o‘t ochganini ma’lum qilgandi.
Avvalroq Shimoliy Koreya mintaqadagi AQSh harbiylari hamda ularning “vassal kuchlari”ni kuzatish va ularga oid ma’lumotlarni to‘plash maqsadida sun’iy yo‘ldosh yaratishi ma’lum bo‘lgandi.
Yanvar oyida AQSh Shimoliy Koreya raketalarini uchirish chastotasi ortib borayotgani sababli Birlashgan Millatlar Tashkiloti orqali yangi sanksiyalar joriy etishni taklif qilgandi, chunki har bir uchirish Xavfsizlik Kengashi rezolyutsiyalarini buzadi. Bunday sanksiyalar birinchi marta 2006-yilda kiritilgan. Ular Shimoliy Koreyaga raketalar, materiallar va ularni ishlab chiqarish uchun zarur texnologiyalarni olib kirish va olib chiqishni taqiqlashni nazarda tutgan. Keyinchalik chora-tadbirlar kompleksi kengaytirilgan.
Izoh (0)