Rossiya Mudofaa vazirligi Tog‘li Qorabog‘da so‘nggi kunlarda keskinlashayotgan vaziyat Rossiya tinchlikparvar kuchlari tomonidan “barqarorlashtirilgani”ni ma’lum qildi.
“Muzokaralar natijalariga ko‘ra, Ozarbayjon tomoni Furux aholi punkti hududidan o‘z bo‘linmalarini olib chiqishni amalga oshirdi”, — deyiladi Rossiya Mudofaa vazirligi xabarda.
Ozarbayjon Mudofaa vazirligi rossiyalik harbiylarning da’volari haqiqatga to‘g‘ri kelmasligini ma’lum qildi. Boku Ozarbayjon harbiylari qishloqdagi o‘z o‘rnida qolayotganini va “operativ vaziyatni to‘liq nazorat qilayotganini” ta’kidlamoqda.
Tog‘li Qorabog‘dagi yangi keskinlashuv 24-mart kuni boshlandi. U yerda tinchlikparvar kuchlar sifatida joylashtirilgan rossiyalik harbiylar versiyasiga ko‘ra, Ozarbayjon o‘z kuchlarini Rossiyaning nazoratidagi zonaga olib kirgan va Tog‘li Qorabog‘ respublikasi armiyasi bo‘linmalariga dronlar bilan hujum qilgan. Ozarbayjon Tog‘li Qorabog‘da o‘t ochishni to‘xtatish haqidagi kelishuv shartlarini buzganini rad etdi hamda u yer o‘z hududi ekanini bildirib, qo‘shinlarini olib chiqishdan bosh tortdi. Ozarbayjon Mudofaa vazirligi Rossiyadan “Tog‘li Qorabog‘” iborasini ishlatmaslikni va Ozarbayjon hududlari nomini to‘g‘ri ko‘rsatishni so‘radi.
2020-yil sentabr oyi oxirida Tog‘li Qorabog‘da ko‘p yillar davomida birinchi marta keng ko‘lamli harbiy harakatlar boshlangandi. Ular bir yarim oy davom etdi; 10-noyabr kuni tomonlar Rossiya vositachiligida o‘t ochishni to‘xtatish to‘g‘risida kelishuvga erishdi. Janglar natijasida Armaniston Tog‘li Qorabog‘ respublikasining qariyb yarmini Ozarbayjonga qaytardi. Rossiya Tog‘li Qorabog‘ga tinchlikparvar kontingentini yubordi.
Mavzuga doir: Tog‘li Qorabog‘ hukumati harbiy holat e’lon qildi
Izoh (0)