Iqtisodiy taraqqiyot va kambag‘allikni qisqartirish vazirligi “Elektromobillar ishlab chiqarish va ulardan foydalanishni tashkil etishni qo‘llab-quvvatlash choralari to‘g‘risida”gi prezident qarori loyihasini muhokamaga qo‘ydi.
Qarorga ko‘ra, elektromobillar va elektrobuslarni (M1, M2, M3, N1, N2, N3 kategoriyadagi) xarid qilish va ulardan foydalanishni rag‘batlantirish maqsadida 2022-yil 1-apreldan 2030-yil 31-aprelgacha qadar:
- quvvatlantirish stansiyalari hamda ularning har biri atrofida kamida ikkita elektromobil uchun to‘xtash joyi joylashgan yer uchastkalari yer solig‘i to‘lashdan ozod etiladi;
- yuridik shaxslarning mijozlarni jalb qilish uchun quvvatlantirish stansiyalarni tashkil etish bilan bog‘liq xarajatlari, daromad solig‘ini hisoblashda chegirib tashlanadigan xarajatlar hisoblanadi. Bunda, ushbu chegiriladigan xarajatlar soliq solinadigan bazaning 2 foizidan oshmasligi lozim;
- elektromobillarni respublika hududiga olib kirishda ular bojxona bojidan ozod qilinadi hamda ishlab chiqarilgan sanasi bir yildan oshmagan elektr dvigatelda harakatlanuvchi avtomototransport vositalarini “erkin muomalaga chiqarish” (import) bojxona rejimida rasmiylashtiradigan jismoniy va yuridik shaxslar 2027-yil 1-yanvarga qadar utilizatsiya yig‘imi to‘lashdan ozod etiladi;
- respublika hududiga olib kiriladigan elektromobillarni quvvatlantirish stansiyalari, ularning komponentlari va servis infratuzilmasi texnologik asbob-uskunalari bojxona bojidan (bojxona rasmiylashtirish yig‘imlari bundan mustasno) ozod qilinadi.
Bunda, mazkur bandda nazarda tutilgan tashkilotlar tomonidan 2022-yildan boshlab xarid qilinadigan transport vositalarining kamida 20 foizi elektromobillar bo‘lishi talab etiladi.
Bundan tashqari qaror loyihasida vazirliklar, idoralar, budjet tashkilotlari, xo‘jalik birlashmalari, mahalliy hokimiyat organlari hamda ustav kapitalida davlat ulushi 50 foizdan ortiq bo‘lgan korxonalar elektrobuslarni mahalliy ishlab chiqaruvchi va servis xizmatiga ega korxonalardan xarid qilishi belgilangan.
Mahalliy ishlab chiqaruvchilar tomonidan elektromobillar, gibrid avtomobillar va elektrobuslarni loyihalashtirish, sinash hamda ishlab chiqarishni yo‘lga qo‘yish maqsadida dastlabki namuna sifatidagi avtomobillar, butlovchi qism va xomashyo materiallar, shu jumladan, texnologik uskuna va jihozlarni (20 dona yoki mashina-to‘plamlar) xarid qilishda potensial xamkor korxonalar bilan to‘g‘ridan to‘g‘ri shartnoma tuzishga rozilik beriladi.
Eslatib o‘tamiz, Shavkat Mirziyoyev 14-fevral kuni mashinasozlik sanoatiga bag‘ishlangan yig‘ilishda elektromobillar ishlab chiqarish tarmog‘iga ham to‘xtalib o‘tgandi. “Jahonda elektromobillar ishlab chiqarish jadal rivojlanib, avtomobil bozorida salmoqli o‘rin egallamoqda. Biz ham bu sohada ortda qolmasligimiz uchun amaliy ishlarni hozirdan boshlashimiz kerak”, — degan edi prezident yig‘ilishda. O‘shanda mutasaddilarga uch oy muddatda elektromobil tarmog‘ini rivojlantirish strategiyasini kiritish topshirilgan edi.
Izoh (0)