Иқтисодий тараққиёт ва камбағалликни қисқартириш вазирлиги «Электромобиллар ишлаб чиқариш ва улардан фойдаланишни ташкил этишни қўллаб-қувватлаш чоралари тўғрисида»ги президент қарори лойиҳасини муҳокамага қўйди.
Қарорга кўра, электромобиллар ва электробусларни (М1, М2, М3, N1, N2, N3 категориядаги) харид қилиш ва улардан фойдаланишни рағбатлантириш мақсадида 2022 йил 1 апрелдан 2030 йил 31 апрелгача қадар:
- қувватлантириш станциялари ҳамда уларнинг ҳар бири атрофида камида иккита электромобиль учун тўхташ жойи жойлашган ер участкалари ер солиғи тўлашдан озод этилади;
- юридик шахсларнинг мижозларни жалб қилиш учун қувватлантириш станцияларни ташкил этиш билан боғлиқ харажатлари, даромад солиғини ҳисоблашда чегириб ташланадиган харажатлар ҳисобланади. Бунда, ушбу чегириладиган харажатлар солиқ солинадиган базанинг 2 фоизидан ошмаслиги лозим;
- электромобилларни республика ҳудудига олиб киришда улар божхона божидан озод қилинади ҳамда ишлаб чиқарилган санаси бир йилдан ошмаган электр двигателда ҳаракатланувчи автомототранспорт воситаларини «эркин муомалага чиқариш» (импорт) божхона режимида расмийлаштирадиган жисмоний ва юридик шахслар 2027 йил 1 январга қадар утилизация йиғими тўлашдан озод этилади;
- республика ҳудудига олиб кириладиган электромобилларни қувватлантириш станциялари, уларнинг компонентлари ва сервис инфратузилмаси технологик асбоб-ускуналари божхона божидан (божхона расмийлаштириш йиғимлари бундан мустасно) озод қилинади.
Бунда, мазкур бандда назарда тутилган ташкилотлар томонидан 2022 йилдан бошлаб харид қилинадиган транспорт воситаларининг камида 20 фоизи электромобиллар бўлиши талаб этилади.
Бундан ташқари қарор лойиҳасида вазирликлар, идоралар, бюджет ташкилотлари, хўжалик бирлашмалари, маҳаллий ҳокимият органлари ҳамда устав капиталида давлат улуши 50 фоиздан ортиқ бўлган корхоналар электробусларни маҳаллий ишлаб чиқарувчи ва сервис хизматига эга корхоналардан харид қилиши белгиланган.
Маҳаллий ишлаб чиқарувчилар томонидан электромобиллар, гибрид автомобиллар ва электробусларни лойиҳалаштириш, синаш ҳамда ишлаб чиқаришни йўлга қўйиш мақсадида дастлабки намуна сифатидаги автомобиллар, бутловчи қисм ва хом ашё материаллар, шу жумладан, технологик ускуна ва жиҳозларни (20 дона ёки машина-тўпламлар) харид қилишда потенциал хамкор корхоналар билан тўғридан-тўғри шартнома тузишга розилик берилади.
Эслатиб ўтамиз, Шавкат Мирзиёев 14 февраль куни машинасозлик саноатига бағишланган йиғилишда электромобиллар ишлаб чиқариш тармоғига ҳам тўхталиб ўтганди. «Жаҳонда электромобиллар ишлаб чиқариш жадал ривожланиб, автомобиль бозорида салмоқли ўрин эгалламоқда. Биз ҳам бу соҳада ортда қолмаслигимиз учун амалий ишларни ҳозирдан бошлашимиз керак», — деган эди президент йиғилишда. Ўшанда мутасаддиларга уч ой муддатда электромобиль тармоғини ривожлантириш стратегиясини киритиш топширилган эди.
Изоҳ (0)