Namangan viloyatining Kosonsoy tumanida Qirg‘izistondan olib kelingan “AKS-74” jangovar o‘qotar qurolini sotishga uringan shaxs qo‘lga olindi.
Ma’lum qilinishicha, 39 yoshli fuqaro A.O. Jalolobod viloyati Olabuqa tumaniga borib, 1 dona “AKS-74” jangovar o‘qotar quroli, 3 dona o‘qdon va 43 dona o‘q-dorilarni olgan hamda kontrabanda yo‘li bilan O‘zbekiston hududiga o‘tkazgan. Aniqlanishicha, ushbu fuqaro muqaddan Jinoyat kodeksining 97 (qasddan odam o‘ldirish) va 182 (bojxona to‘g‘risidagi qonunchilikni buzish) moddalari bilan sudlangan.
DXXning Namangan viloyati bo‘yicha boshqarmasi xodimlari tomonidan viloyat bojxona boshqarmasi bilan hamkorlikda o‘tkazilgan tezkor tadbirda A.O. ushbu qurol va o‘q-dorilarni Namangan shahrida sotmoqchi bo‘lganida ushlangan.
Hozirda mazkur shaxsga nisbatan DXXning Namangan viloyati bo‘yicha boshqarmasi Tergov bo‘limi tomonidan Jinoyat kodeksining 246 (kontrabanda) va 248-moddalari (qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish) bilan jinoyat ishi qo‘zg‘atilib, qamoq ehtiyot chorasi qo‘llanilgan.
Bundan oldin Toshkentda o‘qotar qurolni 2 ming dollarga sotmoqchi bo‘lgan yigitlar ushlangan edi.
Izoh (0)