Ikki vazn toifasida UFC sobiq chempioni Konor Makgregor mashinani xavfli boshqargani tufayli hibsga olindi.
Xabarga ko‘ra, sportchining 170 ming yevrolik Bentley avtomobili ham vaqtinchalik musodara qilingan.
Konor Makgregorning vakili Karen Kessler voqeani bayon etgan.
“Janob Makgregor sport zaliga ketayotgan vaqtda Irlandiya politsiyasi uni to‘xtatib, yo‘l harakati qoidalarini buzganlikda ayblab, mahkamaga olib ketgan. Sportchi bo‘limda narkotik moddalar va alkogolga test topshirgan”, — deya Kesslerning so‘zlaridan iqtibos keltiradi ESPN MMA Twitter sahifasi.
Konor allaqachon garov evaziga ozod qilingan va keyingi oyda bo‘lib o‘tadigan sud jarayonini kutmoqda. 2017-yilda ham Makgregor tezlikni oshirgani uchun sudda qatnashgan va 400 yevro jarima to‘lagan edi.
Avvalroq, Konor Makgregor Londonning “Chelsi” klubini sotib olish istagi borligini bildirgandi.
Makgregor UFC’dagi so‘nggi janggini 2021-yil 11-iyul kuni Dastin Poryega qarshi o‘tkazgandi. Irlandiyalik sportchi birinchi raunddayoq texnik nokaut tufayli Poryega mag‘lub bo‘lgan edi.
Izoh (0)