Конор Макгрегор ҳибсга олинди. Спортчи машинани хавфли бошқаргани айтилмоқда

Икки вазн тоифасида UFC собиқ чемпиони Конор Макгрегор машинани хавфли бошқаргани туфайли ҳибсга олинди.

Хабарга кўра, спортчининг 170 минг евролик Bentley автомобили ҳам вақтинчалик мусодара қилинган.

Конор Макгрегорнинг вакили Карен Кесслер воқеани баён этган.

«Жаноб Макгрегор спорт залига кетаётган вақтда Ирландия полицияси уни тўхтатиб, йўл ҳаракати қоидаларини бузганликда айблаб, маҳкамага олиб кетган. Спортчи бўлимда наркотик моддалар ва алкоголга тест топширган», — дея Кесслернинг сўзларидан иқтибос келтиради ESPN MMA Twitter саҳифаси.

Конор аллақачон гаров эвазига озод қилинган ва кейинги ойда бўлиб ўтадиган суд жараёнини кутмоқда. 2017 йилда ҳам Макгрегор тезликни оширгани учун судда қатнашган ва 400 евро жарима тўлаган эди.

Аввалроқ, Конор Макгрегор Лондоннинг «Челси» клубини сотиб олиш истаги борлигини билдирганди. 

Макгрегор UFC’даги сўнгги жанггини 2021 йил 11 июль куни Дастин Порьега қарши ўтказганди. Ирландиялик спортчи биринчи раунддаёқ техник нокаут туфайли Порьега мағлуб бўлган эди.