O‘zbekiston fuqarolarini Ukrainadan Polsha hududi orqali evakuatsiya qilish jarayoni nihoyasiga yetdi. Bu haqda O‘zbekistonning Polshadagi elchisi Bahrom Boboyev “Dunyo” agentligiga xabar berdi.
“Bu juda murakkab va xavotirli davr bo‘ldi, mamlakatimiz rahbariyati tomonidan O‘zbekistonning har bir fuqarosi uchun mas’uliyat Ukraina va Polshadagi diplomatiya vakolatxonalarimiz zimmasiga yuklatildi”, — deydi elchi.
Elchining so‘zlariga ko‘ra, Ukraina—Polsha chegarasida konsullik xodimlari, Varshavadagi elchixonada tuzilgan shtab 18 kun davomida tun-u kun ishlagan.
28-fevral kuni bortidan O‘zbekiston fuqarolari joy olgan birinchi samolyot Katovitse shahri aeroportidan Toshkentga uchib ketgan. Har kuni Uzbekistan Airways AJ tasarrufidagi 2-3 ta maxsus samolyot Toshkentga uchgan. Polshadan hammasi bo‘lib 25 havo qatnovi vositasida 5786 nafar fuqaro O‘zbekistonga eltib qo‘yilgan.
“Dastlab O‘zbekistonga uchishni xohlovchilar soni 1,5-2 ming nafardan oshmasligi taxmin qilingan edi, biroq Ukrainadagi tez o‘zgaruvchan vaziyat bu taxminlarga mos kelmadi. Odamlarning kelishi oqimi kun sayin o‘sib bordi, 2—4-mart kunlari esa ularning soni juda ko‘paydi — o‘sha kunlari to‘planish nuqtasi va aeroportning har birida vatanga uchishni istayotgan 700-800 nafardan odam to‘plandi”, — deydi Boboyev.
Boboyevning qayd etishicha, Toshkentdagi barcha mutasaddi tashkilotlar — Tashqi ishlar, Transport vazirliklari, Uzbekistan Airways AJ va aeroport hamkorlikda juda katta vazifaning uddasidan chiqqan. Davlat rahbari nomidan Prezident administratsiyasi va bosh vaziri evakuatsiya bilan bog‘liq jarayonni qat’iy nazorat qilib borgan.
Eslatib o‘tamiz, Polshadan aholini evakuatsiya qilish bo‘yicha maxsus komissiya boshidanoq evakuatsiya uchun muhlatni 2022-yilning 15-martigacha belgilagan edi. Keyin esa chet el fuqarolari uchun vizasiz tartib tugaydi va jarimalar qo‘llanishi boshlanishi aytilgandi.
Izoh (0)