Ўзбекистон фуқароларини Украинадан Польша ҳудуди орқали эвакуация қилиш жараёни ниҳоясига етди. Бу ҳақда Ўзбекистоннинг Польшадаги элчиси Баҳром Бобоев «Дунё» агентлигига хабар берди.
«Бу жуда мураккаб ва хавотирли давр бўлди, мамлакатимиз раҳбарияти томонидан Ўзбекистоннинг ҳар бир фуқароси учун масъулият Украина ва Польшадаги дипломатия ваколатхоналаримиз зиммасига юклатилди», — дейди элчи.
Элчининг сўзларига кўра, Украина—Польша чегарасида консуллик ходимлари, Варшавадаги элчихонада тузилган штаб 18 кун давомида тун-у кун ишлаган.
28 февраль куни бортидан Ўзбекистон фуқаролари жой олган биринчи самолёт Катовице шаҳри аэропортидан Тошкентга учиб кетган. Ҳар куни Uzbekistan Airways АЖ тасарруфидаги 2-3 та махсус самолёт Тошкентга учган. Польшадан ҳаммаси бўлиб 25 ҳаво қатнови воситасида 5786 нафар фуқаро Ўзбекистонга элтиб қўйилган.
«Дастлаб Ўзбекистонга учишни хоҳловчилар сони 1,5-2 минг нафардан ошмаслиги тахмин қилинган эди, бироқ Украинадаги тез ўзгарувчан вазият бу тахминларга мос келмади. Одамларнинг келиши оқими кун сайин ўсиб борди, 2—4 март кунлари эса уларнинг сони жуда кўпайди — ўша кунлари тўпланиш нуқтаси ва аэропортнинг ҳар бирида ватанга учишни истаётган 700-800 нафардан одам тўпланди», — дейди Бобоев.
Бобоевнинг қайд этишича, Тошкентдаги барча мутасадди ташкилотлар — Ташқи ишлар, Транспорт вазирликлари, Uzbekistan Airways АЖ ва аэропорт ҳамкорликда жуда катта вазифанинг уддасидан чиққан. Давлат раҳбари номидан Президент администрацияси ва бош вазири эвакуация билан боғлиқ жараённи қатъий назорат қилиб борган.
Эслатиб ўтамиз, Польшадан аҳолини эвакуация қилиш бўйича махсус комиссия бошиданоқ эвакуация учун муҳлатни 2022 йилнинг 15 мартигача белгилаган эди. Кейин эса чет эл фуқаролари учун визасиз тартиб тугайди ва жарималар қўлланиши бошланиши айтилганди.
Изоҳ (0)