Oliy Majlis Senati Rossiya va Ukraina muammolarini tinchlik yo‘li bilan hal qilishi tarafdori. Bu haqda 17-mart kuni bo‘lib o‘tgan Senatning navbatdagi yalpi majlisida Mudofaa va xavfsizlik masalalari qo‘mitasi raisi Qutbiddin Burhonov “Daryo” muxbiriga bergan qisqacha intervyusida aytib o‘tdi.
Yalpi majlisda tashqi ishlar vaziri Abdulaziz Komilov Rossiya va Ukraina o‘rtasidagi vaziyatga munosabat bildirgan edi. Vazir o‘z chiqishida: “Ukraina atrofidagi vaziyat O‘zbekistonda jiddiy xavotir uyg‘otmoqda. Biz bu masalaning tinch yo‘l bilan hal qilinishi tarafdorimiz. Buning uchun birinchi navbatda harbiy harakatlar, zo‘ravonliklar zudlik bilan to‘xtatilishi zarur”, — deya ta’kidlagan.
Qutbiddin Burhonov tashqi ishlar vazirining chiqishiga munosabat bildirar ekan, O‘zbekistonning olib borayotgan siyosati — bu tinchlik siyosati ekanligini ta’kidlab o‘tdi.
“O‘zbekiston fuqarolari bugungi kunda Rossiya Federatsiyasiga borib ishlamoqda, tirikchiligini qilmoqda va oilasini boqmoqda. Ukrainaga nisbatan ham bizning hurmatimiz juda yuqori. Mustaqil, suveren davlat. Ko‘p farzandlarimiz oliy o‘quv yurtlarida o‘qiyotgan edi. Davlat tashkilotlari va korxonalarida ishlayotganlar bor edi. Ukraina bilan iqtisodiy munosabatimiz ham juda yaxshi edi. Biz ham senator sifatida tashqi ishlar vaziri aytganidek, har ikki davlat, barcha muamolarini tinchlik yo‘li bilan hal qilishi tarafdorimiz”, — dedi senator.
Eslatib o‘tamiz, 24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini e’lon qilgan edi. O‘zbekiston prezidentining matbuot kotibi Sherzod Asadov Shavkat Mirziyoyev 25-fevral kuni Vladimir Putin bilan telefon orqali muloqot qilgani yuzasidan bergan qo‘shimcha ma'lumotida O‘zbekiston bu masala bo‘yicha vazmin, neytral pozitsiyada ekanligini ma’lum qilgandi.
Izoh (0)