Samarqand shahrida 170 million dollar mablag‘ sarflanib, qayta ta’mirlangan xalqaro aeroport foydalanishga topshirildi. Bu haqda “Daryo” muxbiri Farhod Norbo‘tayev xabar berdi.
2,5 yil muddatda qayta ta’mirlangan mazkur inshoot Turkiya kompaniyasi tomonidan loyihalashtirilgan bo‘lib, ochiq kitob qiyofasini aks ettirgan.
2019-yil iyul oyida prezident Shavkat Mirziyoyev tamal toshini qo‘ygan inshoot ochilishida bosh vazirning birinchi o‘rinbosari Ochilboy Ramatov va Samarqand viloyati hokimi Erkinjon Turdimov ishtirok etdi.
“Samarqand xalqaro aeroporti juda katta aeroportga aylandi. Endilikda bu yerda bir vaqtning o‘zida 26 ta katta samolyotni saqlash imkoniyati bor. Bir kunda 70 ta katta samolyotga xizmat qilish imkoniga ega bo‘lgan aeroportda avvaliga haftasiga 120 ta samolyot uchadi”, — dedi Ochilboy Ramatov.
Ochilish marosimida ta’kidlanishicha, zamonaviy texnologiyalar yordamida barpo etilgan xalqaro aeroport 19-martdan boshlab yo‘lovchilarga xizmat ko‘rsatishni boshlaydi.
“Aeroportning yuqoridan ko‘rinishi Mirzo Ulug‘bekning ‘Ziji Ko‘ragoniy’ kitobining ochiq holdagi qiyofasini eslatadi. Endilikda yo‘lovchi-sayyohlar aeroport oldigacha shaxsiy va jamoat transportida kelish imkoniyatiga ega bo‘ldi. Yo‘lovchilarning eng ko‘p e’tirozlariga sabab bo‘lgan holat — hujjatlarni rasmiylashtirishdagi uzundan uzun navbatlar va yuklarni nazoratdan o‘tkazishdagi soatlab kutishlarga barham berildi. Yangi aeroportda zamonaviy radioaloqa va yoritish tizimi qurilgan. To‘rtta yangi trap tayyorlangan. Hududda 70 ta samolyot, 700 ta yengil avtomobil uchun maxsus bekatlar qurilgan”, — deydi viloyat hokimi Erkinjon Turdimov.
Izoh (0)