Italiya hukumati Ukrainaga 16-mart kuni aviazarbalar oqibatida yakson qilingan Mariupoldagi drama teatrini qayta tiklashga yordam beradi, deb xabar bermoqda Meduza.
“Vazirlar Mahkamasi teatrni qisqa vaqtlar ichida qayta tiklash uchun Ukrainaga resurs va mablag‘larni taqdim etish to‘g‘risidagi taklifimni ma’qulladi. Barcha mamlakatlarning teatrlari butun insoniyatga tegishli”, — deb yozadi Italiya madaniyat vaziri Dario Francheskini.
Mahalliy hukumat ma’lumotlariga ko‘ra, Mariupoldagi drama teatri 16-mart kuni Rossiya qo‘shinlari tomonidan amalga oshirilgan aviazarba oqibatida vayron qilingan. Bino ichida yuzlab tinch aholi yashiringani aytilmoqda. Dastlabki ma’lumotlarga qaraganda, hech kimga jarohat yetmagan.
Rossiya Mudofaa vazirligining ma’lum qilishicha, Rossiya aviatsiyasi 16-mart kuni kunduzi “Mariupol shahridagi nishonlarga zarbalar berish bilan bog‘liq birorta vazifani amalga oshirmagan”. Idora vakillarining aytishicha, teatr binosi “Azov” batalyoni tomonidan portlatilgan.
Avvalroq Bayden Putinni “qonxo‘r diktator va haqiqiy kallakesar” deb atagani, Jonli efirda urushga qarshi namoyish bilan chiqqan Rossiyaning “Birinchi kanal” muharriri Marina Ovsyannikova ishdan bo‘shagani, BMT Xalqaro sudi Rossiyadan Ukrainadagi harbiy harakatlarini to‘xtatishni talab qilgani to‘g‘risida xabar berilgandi.
Izoh (0)