Италия ҳукумати Украинага 16 март куни авиазарбалар оқибатида яксон қилинган Мариуполдаги драма театрини қайта тиклашга ёрдам беради, деб хабар бермоқда Meduza.
«Вазирлар Маҳкамаси театрни қисқа вақтлар ичида қайта тиклаш учун Украинага ресурс ва маблағларни тақдим этиш тўғрисидаги таклифимни маъқуллади. Барча мамлакатларнинг театрлари бутун инсониятга тегишли», — деб ёзади Италия маданият вазири Дарио Франческини.
Маҳаллий ҳукумат маълумотларига кўра, Мариуполдаги драма театри 16 март куни Россия қўшинлари томонидан амалга оширилган авиазарба оқибатида вайрон қилинган. Бино ичида юзлаб тинч аҳоли яширингани айтилмоқда. Дастлабки маълумотларга қараганда, ҳеч кимга жароҳат етмаган.
Россия Мудофаа вазирлигининг маълум қилишича, Россия авиацияси 16 март куни кундузи «Мариупол шаҳридаги нишонларга зарбалар бериш билан боғлиқ бирорта вазифани амалга оширмаган». Идора вакилларининг айтишича, театр биноси «Азов» батальони томонидан портлатилган.
Аввалроқ Байден Путинни «қонхўр диктатор ва ҳақиқий каллакесар» деб атагани, Жонли эфирда урушга қарши намойиш билан чиққан Россиянинг «Биринчи канал» муҳаррири Марина Овсянникова ишдан бўшагани, БМТ Халқаро суди Россиядан Украинадаги ҳарбий ҳаракатларини тўхтатишни талаб қилгани тўғрисида хабар берилганди.
Изоҳ (0)