Qo‘shma Shtatlar Pentagonning Ukraina hududidagi harbiy-biologik faolligiga oid ma’lumotlarni oshkor etishi kerak. Bu haqda Rossiyaning AQSHdagi elchixonasi o‘zining Telegram’dagi kanali orqali ma’lum qildi.
“Amerika tomonidan maksimal darajada qisqa muddat ichida Ukraina hududida joylashgan laboratoriyalardagi harbiy-biologik faollikka oid ma’lumotlarni oshkor etishini talab qilamiz. Barcha ishlar ortida Pentagon turgan bo‘lsa, qanday qilib tinch tadqiqotlar haqida gap bo‘lishi mumkin?”, — deyiladi xabarda.
Diplomatlarning ta’kidlashicha, Amerikaning Rossiya kimyoviy qurollarni taqiqlash to‘g‘risidagi konvensiyani buzganlik haqidagi ayblovlari va da’volari jiddiy dosh bermaydi. Shu bilan birga, AQSHning o‘zi hozirga qadar “jangovar zaharlovchi vositalar milliy zaxirasini” yo‘q qilmagan.
Elchixona vakillarining so‘zlariga ko‘ra, Rossiyaga “Ukraina radikal guruhlari AQSH razvedka xizmatlari nazorati ostida tinch aholiga qarshi zaharli kimyoviy moddalarni qo‘llash bo‘yicha bir nechta ehtimoliy ssenariylarni tayyorlagani to‘g‘risida ma’lum”. Diplomatlarning ma’lum qilishicha, biolaboratoriyalarni rivojlantirishga jami 32 million dollar yo‘naltirilgan.
16-mart kuni Rossiya prezidenti Vladimir Putin Ukrainada bevosita Rossiya chegarasi yaqinida biologik qurol komponentlari yaratilganini ma’lum qilgandi. Uning so‘zlariga ko‘ra, Pentagon rahbarligi va moliyaviy ko‘magida o‘nlab laboratoriyalar tarmog‘i “harbiy-biologik dasturlar, jumladan, koronavirus, Sibir kuydirgisi, Afrika cho‘chqa o‘lati va boshqa halokatli kasalliklar namunalari bilan tajribalar o‘tkazgan”.
Oldinroq Rossiya Mudofaa vazirligi Ukrainada biologik qurol komponentlarini yaratilayotgani aytilgan hujjatlarni e’lon qilgandi. Idora rasmiy vakili general-mayor Igor Konashenkovning so‘zlariga ko‘ra, shundan so‘ng, “Ukraina Sog‘liqni saqlash vazirligi barcha biolaboratoriyalarga xavfli patogenlar saqlanadigan zaxiralarini zudlik bilan yo‘q qilish bo‘yicha ko‘rsatma yuborgan”.
AQSH davlat kotibi o‘rinbosari Viktoriya Nuland Senatdagi eshituvda Ukrainada biologik tadqiqot obyektlari bo‘lganini tasdiqlagan. U mazkur tadqiqotlar haqida hech qanday batafsil ma’lumotlarni keltirmagan. Pentagon va Oq uy esa bu ma’lumotlarni rad etgan. BMT Ukrainada ishlagan JSST xodimlarining bunday tadqiqotlarda xabari yo‘qligini ma’lum qilgan.
Izoh (0)