Ukraina prezidenti Vladimir Zelenskiy va Ukraina xalqiga tinchlik bo‘yicha Nobel mukofotini berish so‘ralmoqda. Yevropa siyosatchilar bu boradagi murojaatini Nobel qo‘mitasiga yo‘llagan.
Ma’lum qilinishicha, ukrainalik yetakchi nomzodini mukofotga yevropalik siyosatchilar ilgari surgan bo‘lib, ular orasida Yevropa davlatlarining sobiq va amaldagi vazirlar, shuningdek, deputatlar bor.
Ular o‘z xatida qo‘mitadan Nobel mukofotiga nomzodlarni ilgari surish muddatini 2022-yilning 31-martiga qadar uzaytirishni so‘ragan. Bu arizalarni qabul qilish deyarli to‘xtatilgani va uzaytirish to‘g‘risidagi qarorsiz yangi nomzodlar mukofotga da’vogarlar qatoriga kiritilmaydi.
“Sodir bo‘layotgan aqlbovar qilmas voqealarni hisobga olgan holda, biz Nobel mukofoti qo‘mitasini tinchlik bo‘yicha 2022-yilgi Nobel mukofotiga nomzod ko‘rsatish jarayonini qayta ochish va ko‘rib chiqishga chaqiramiz. Bu qoidalarning buzilishi ekanini tushunamiz, ammo hozirgi misli ko‘rilmagan vaziyat uni oqlashiga ishonamiz”, — deyiladi murojaatda.
“Biz Ukraina xalqining Rossiya tomonidan boshlangan urushda ko‘rsatayotgan jasoratiga guvohmiz. Jasur ukrain erkak va ayollari — Ukraina prezidenti Vladimir Zelenskiydan tortib, oddiy fuqarogacha demokratiya hamda musataqillikni saqlash uchun kurashmoqda”, — deya ta’kidlanadi xabarda.
Siyosatchilar orasida — Estoniya sobiq tashqi ishlar vaziri, Yevropa parlamenti a’zosi Urmas Paet, Estoniya sobiq bosh vaziri Andrus Ansip, Gaaga strategik tadqiqotlar markazining siyosiy masalalar bo‘yicha direktori va parlamentning sobiq a’zosi Gen ten Bruke, Yevropa parlamenti a’zolari Ester de Lanj, Katrin Langenzipen, Niderlandiya sobiq mudofa vazirlari Ank Beyleveld va Yoris Vorgoyev, Niderlaniya sobiq tashqi ishlar vazirlari Bernard Bot, Bert Koenders va Maksim Ferxagen, Niderlandiya sobiq bosh vaziri Gay Verxofstadt va boshqalar bor.
Eslatib o‘tamiz, 2021-yilgi tinchlik bo‘yicha Nobel mukofotiga Rossiyaning “Novaya gazeta” nashri bosh muharriri Dmitriy Muratov va filippinlik jurnalist, Rapple muxolifatchi sayti rahbari Mariya Ressa sazovor bo‘lgandi. Nobel mukofoti ularga “demokratiya hamda barqaror tinchlik o‘rnatilishining dastlabki sharti bo‘lgan fikr bildirish erkinligini himoya qilish bo‘yicha intilishlari” uchun berilgan.
Izoh (0)