Melitopol meri Rossiya harbiylarining qo‘lida asirlikdagi vaqti haqida gapirdi. U tergov izolyatorida ushlab turilgan va “savodsizlarcha yozilgan” hujjatlarni imzolashga majbur qilingan

Rossiya xavfsizlik kuchlari tomonidan o‘g‘irlab ketilgan va 16-mart kuni asirlar almashinuvi natijasida qo‘yib yuborilgan Ukrainaning Melitopol shahri meri Ivan Fedorov “Nastoyashee vremya” nashriga bergan intervyusida asirlikda o‘tkazgan vaqtlari haqida gapirib berdi.

Fedorovning so‘zlariga ko‘ra, uni shahar politsiya boshqarmasining tergov izolyatorida saqlashgan. Rossiya kuchlari, u yerga xususan, hibsga olingan namoyishchilar, qo‘poruvchilikda gumon qilinayotganlarni olib kelardi. Merga nisbatan hech qanday kuch ishlatilmagan, ammo u boshqa mahbuslarning chinqiriqlarini eshitgan.

Fedorovning so‘zlariga ko‘ra, unga ishdan bo‘shash to‘g‘risida, “qandaydir deputatlarni tayinlash, qandaydir vazifalarni bajarish” to‘g‘risidagi hujjatlarni imzolashga majbur qilingan. U yuridik ahamiyatga ega bo‘lmagan bir qator hujjatlarni imzolagani va shu tufayli “sog‘ qolganini” aytdi.

Bu odamlar mutlaqo savodsiz, ular Ukraina qonunchiligini tushunmaydi — mer qalam tekkizgani bilan ishdan bo‘shata olmaydi, iste’foni shahar kengashi deputatlari qabul qilishi kerak. Ular shahar meri deputat tayinlay olmasligini tushunmaydi, buning uchun shahar kengashi deputatlari ovoz berishi kerak. Shundan so‘ng ular jamoaga Rossiya bayroqlari ostida va qandaydir mer vazifasini bajaruvchi bilan ishlashni davom ettirishi haqida ko‘rsatma berishimni xohladi. Keyin kommunal xizmatlarga ishini davom ettirishi haqida ko‘rsatma berishimni so‘radi.

Fedorovning so‘zlariga ko‘ra, asirdagi rossiyaliklar bilan uning almashinuvi ikkinchi urinishda va Zaporojye viloyatining Vasilyevskiy tumanidagi demarkatsiya chizig‘ida sodir bo‘lgan.

Bu juda hayajonli edi, chunki almashinuv bo‘yicha ikkinchi urinish edi. Birinchi urinish muvaffaqiyatsiz bo‘lgan. Rossiya harbiylari mamlakatim meni olib ketishni xohlamaganini aytgan va meni kameraga qaytarib yuborishgandi. Ishoning, bu juda qiyin sinov, ular sizni boshingizda sumkangiz bilan yetti soat davomida olib yuradi — qayerdasiz, qayerga ketyapsiz tushunmaysiz, eng yomoni sizni olib ketayotganlarga mutlaqo ishonmaysiz.

Ivan Fedorov 9-mart kuni o‘g‘irlab ketilgan. U g‘oyib bo‘lgandan so‘ng darhol Donetsk va Luganskda uni terrorizmni qo‘llab-quvvatlashda ayblashayotgani haqida gapirildi; u Luganskga olib kelingani to‘g‘risida ma’lumot bor edi. Uning yo‘qligida rossiyaparast “Muxolifat bloki”dan mahalliy deputat Galina Danilchenko shahar rahbari vazifasini bajaruvchi etib e’lon qilindi. Ukraina hukumati uni davlatga xiyonatda aybladi.