Prezident Shavkat Mirziyoyev 2022-yilning 4-mart kuni talabalarning ishlab, daromad topishi haqida gapirib, bu borada universitet rektorlari va hokimlarning harakati sust ekanini tanqid qilgandi. Qarshi davlat universiteti axborot xizmati rahbari Oybek Yusupovning “Daryo”ga ma’lumot berishicha, prezident tanqididan so‘ng OTMda 139 nafar talab ishli bo‘lgan.
“O‘rganishlar davomida oliy ta’lim muassasasida 543 nafar ijtimoiy himoyaga muhtoj talaba yoshlar borligi ma’lum bo‘ldi. Shu talabalarning bilim va salohiyatidan kelib chiqib, 48 nafari universitetdagi mavjud bo‘sh ish o‘rinlariga joylashtirildi. 41 nafari universitet hududida joylashgan savdo va xizmat ko‘rsatish korxonalarida ish boshladi. Universitet qoshida ‘Chevar qizlar’ tikuvchilik sexi tashkil etilib, 20 nafar talaba qiz ishli bo‘ldi”, — deydi Oybek Yusupov.
Aytilishicha, tikuvchi talabalarga 1 million 200 ming so‘mdan 2 million so‘mgacha oylik maosh belgilangan.
“Oilada akam va men to‘lov-shartnoma asosida tahsil olamiz. O‘zim ikkinchi guruh nogironiman. Ijtimoiy ahvolimizni inobatga olgan holda ‘Chevar qizlar’ tikuvchilik sexiga birinchilardan bo‘lib ishga qabul qilindim. Minnatdorligimni so‘z bilan ifodalab berolmayman. Ishim o‘qishimga umuman xalaqit bermaydi. Tushgacha darsda bo‘laman. Tushdan keyin esa tikuvchilik sexida ishlayman. Prezidentimizga biz yoshlarga qaratayotgan e’tibori uchun cheksiz tashakkur izhor qilaman”, — deydi pedagogika fakulteti talabasi Gulbahor Choriyeva.
Qo‘shimcha qilinishicha, talabalar bandligini ta’minlash uchun viloyat Ekologiya va atrof-muhitni muhofaza qilish boshqarmasi, viloyat IIB hamda universitet hamkorligida “Yosh ekopatrul” guruhi faoliyati ham yo‘lga qo‘yilib, universitetning ekologiya va atrof-muhit muhofazasi ta’lim yo‘nalishida tahsil olayotgan 20 nafar talaba ishga jalb qilingan.
Izoh (0)