Президент Шавкат Мирзиёев 2022 йилнинг 4 март куни талабаларнинг ишлаб, даромад топиши ҳақида гапириб, бу борада университет ректорлари ва ҳокимларнинг ҳаракати суст эканини танқид қилганди. Қарши давлат университети ахборот хизмати раҳбари Ойбек Юсуповнинг «Дарё»га маълумот беришича, президент танқидидан сўнг ОТМда 139 нафар талаб ишли бўлган.
«Ўрганишлар давомида олий таълим муассасасида 543 нафар ижтимоий ҳимояга муҳтож талаба ёшлар борлиги маълум бўлди. Шу талабаларнинг билим ва салоҳиятидан келиб чиқиб, 48 нафари университетдаги мавжуд бўш иш ўринларига жойлаштирилди. 41 нафари университет ҳудудида жойлашган савдо ва хизмат кўрсатиш корхоналарида иш бошлади. Университет қошида ‘Чевар қизлар’ тикувчилик цехи ташкил этилиб, 20 нафар талаба қиз ишли бўлди», — дейди Ойбек Юсупов.
Айтилишича, тикувчи талабаларга 1 миллион 200 минг сўмдан 2 миллион сўмгача ойлик маош белгиланган.
«Оилада акам ва мен тўлов-шартнома асосида таҳсил оламиз. Ўзим иккинчи гуруҳ ногирониман. Ижтимоий аҳволимизни инобатга олган ҳолда ‘Чевар қизлар’ тикувчилик цехига биринчилардан бўлиб ишга қабул қилиндим. Миннатдорлигимни сўз билан ифодалаб беролмайман. Ишим ўқишимга умуман халақит бермайди. Тушгача дарсда бўламан. Тушдан кейин эса тикувчилик цехида ишлайман. Президентимизга биз ёшларга қаратаётган эътибори учун чексиз ташаккур изҳор қиламан», — дейди педагогика факультети талабаси Гулбаҳор Чориева.
Қўшимча қилинишича, талабалар бандлигини таъминлаш учун вилоят Экология ва атроф-муҳитни муҳофаза қилиш бошқармаси, вилоят ИИБ ҳамда университет ҳамкорлигида «Ёш экопатруль» гуруҳи фаолияти ҳам йўлга қўйилиб, университетнинг экология ва атроф-муҳит муҳофазаси таълим йўналишида таҳсил олаётган 20 нафар талаба ишга жалб қилинган.
Изоҳ (0)