Taxtaqoracha dovonida 13-mart kuni kuchli yomg‘ir yog‘ishi oqibatida M-39 avtomobil yo‘lining 1138–1141-kilometrida qisman o‘pirilish yuzaga kelib, transport vositalarining harakati vaqtincha cheklangani xabar qilingandi. Yo‘l harakati xavfsizligi xizmatining ma’lum qilishicha, dovonda ta’mirlash ishlari olib borilib, avtomobil yo‘li ochildi.
Qayd etilishicha, dovon yo‘lida yuzaga kelgan nosozliklar bartaraf etilib, harakat qatnashchilarining xavfsizligini ta’minlash bo‘yicha choralar ko‘rilgan. Ayni vaqtlarda dovon yo‘lida transport vositalarining harakatlanishi uchun ruxsat berilgan.
“Haydovchilardan qoidalarga rioya qilgan holda, ehtiyotkorlik bilan harakatlanishlarini so‘raymiz”, — deyiladi xabarda.
Avvalroq “O‘zgidromet” hafta davomida (14—20-mart kunlari) kuzatiladigan ob-havo haqida ma’lumot bergandi. Unga ko‘ra, hafta oxirlariga borib yomg‘ir yog‘ib, ayrim joylarda qorga aylanishi mumkin.
Eslatib o‘tamiz, kecha, 12-mart kuni Toshkent shahri Mirzo Ulug‘bek tumanida avtomobillar ustiga daraxt qulab tushgandi. Favqulodda vaziyatlar vazirligi fuqarolardan kuchli shamol va yog‘ingarchilik vaqtida avtotransport vositalarini daraxtlar ostida qoldirmaslikni so‘ragan.
Shuningdek, Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan.
Toshkent shahrida bir necha kundan buyon davom etayotgan yog‘ingarchilik poytaxt aholisi uchun qator noqulayliklar tug‘dirmoqda. Ayrim ko‘chalarda to‘planib qolayotgan suv haydovchi va yo‘lovchilar harakatini murakkablashtirmoqda. “Daryo” holatga aniqlik kiritish maqsadida Toshkent shahar hokimligidan izoh oldi. Hokimlik ko‘chalarda suv yig‘ilib qolishiga odamlar tomonidan tashlab ketilgan axlatlarni sabab qilib ko‘rsatdi.
“O‘zgidromet” ma’lumotiga ko‘ra, vaqti-vaqti bilan yomg‘ir yog‘ishi kuzatiladigan beqaror ob-havo keyingi haftaning birinchi yarmigacha saqlanib turadi. Ayrim viloyatlarda kuchli shamol va momaqaldiroq bo‘lishi mumkin.
Izoh (0)