“O‘zgidromet” kuchli yomg‘irlar sababli respublikaning tog‘oldi va tog‘li hududlarida sel xavfidan ogohlantirib, shunday xavf mavjud tumanlar ro‘yxatini e’lon qilgandi. 13-mart kuni qator hududlarga sel kelgani aks etgan videolar ijtimoiy tarmoqlarda tarqaldi.
Samarqand viloyati Qo‘shrobod tumani “Oktabr” qishlog‘idan oqib o‘tuvchi soyga sel keldi. Videotasvirda sel oqayotganiga qaramay, mashinalarning seldan o‘tishga harakat qilayotgani aks etgan.
“O‘zgidromet” yetakchi mutaxassisi Erkin Abdulahatovning qayd etilishicha, so‘nggi 16 yillik (2005—2021-yillar)da O‘zbekistonda sel-suv toshqinlaridan 70 kishi halok bo‘lgan. Ularning aksariyati sel davrida mashinasi orqali selni kechib o‘tish jarayonida ofat qurboni bo‘lgan.
Samarqand viloyati Favqulodda vaziyatlar boshqarmasi sel toshqinlari biror kimsa hayotiga xavf solgan taqdirda FVVning 1050 qisqa raqamiga yoki 101 ga murojaat qilishga chaqirgan.
Jizzax viloyati Forish tumani qishloqlaridan biriga kelgani aytilayotgan sel. Sel hududdagi maktab, bolalar bog‘chasi bino inshootlariga ham zarar yetkazganini ko‘rish mumkin.
Qashqadaryo viloyati Kitob tumanidagi Qaynar va Ayoqchi qishlog‘iga, Chiroqchi tumani Navro‘z qishlog‘iga kelgani aytilayotgan sel.
Favqulodda vaziyatlar vazirligi xabariga ko‘ra, 13-mart kuni kuzatilgan yog‘ingarchiliklar oqibatida yuzaga kelgan sel oqimlari va suv toshqinlari soha xodimlari va maxsus texnikalari yordamida bartaraf etilmoqda. Hodisa oqibatida tan jarohati olgan va halok bo‘lganlar yo‘q.
Ma’lumot uchun, O‘zbekistonda mart oyi boshlaridan buyon yomg‘irli ob-havo davom etmoqda. Yog‘ingarchilikdan hosil bo‘lgan suv oqimi Qamchiq va Taxtaqoracha dovonlarida avtomobil yo‘lining bir qismini o‘pirib tushishiga sabab bo‘ldi. Muttasil yog‘ingarchilik sabab Buxoro shahridagi XVI asrga oid “Talipoch qal’a darvozasi” chap tomonidagi qal’a devorining bir qismi o‘pirilib tushdi. Bunday ob-havo Farg‘onaning Marg‘ilon shahrida madaniy meros obyekti hisoblanmish Safed to‘da masjidi devorining bir qismi o‘pirilib tushishiga ham olib keldi.
“O‘zgidromet” bunday ob-havo keyingi haftaning birinchi yarmigacha saqlanib turishini prognoz qilgan. Ayrim viloyatlarda kuchli shamol va momoqaldiroq bo‘lishi mumkin.