Тахтақорача довонида 13 март куни кучли ёмғир ёғиши оқибатида М-39 автомобиль йўлининг 1138–1141-километрида қисман ўпирилиш юзага келиб, транспорт воситаларининг ҳаракати вақтинча чеклангани хабар қилинганди. Йўл ҳаракати хавфсизлиги хизматининг маълум қилишича, довонда таъмирлаш ишлари олиб борилиб, автомобиль йўли очилди.
Қайд этилишича, довон йўлида юзага келган носозликлар бартараф этилиб, ҳаракат қатнашчиларининг хавфсизлигини таъминлаш бўйича чоралар кўрилган. Айни вақтларда довон йўлида транспорт воситаларининг ҳаракатланиши учун рухсат берилган.
«Ҳайдовчилардан қоидаларга риоя қилган ҳолда, эҳтиёткорлик билан ҳаракатланишларини сўраймиз», — дейилади хабарда.
Аввалроқ «Ўзгидромет» ҳафта давомида (14—20 март кунлари) кузатиладиган об-ҳаво ҳақида маълумот берганди. Унга кўра, ҳафта охирларига бориб ёмғир ёғиб, айрим жойларда қорга айланиши мумкин.
Эслатиб ўтамиз, кеча, 12 март куни Тошкент шаҳри Мирзо Улуғбек туманида автомобиллар устига дарахт қулаб тушганди. Фавқулодда вазиятлар вазирлиги фуқаролардан кучли шамол ва ёғингарчилик вақтида автотранспорт воситаларини дарахтлар остида қолдирмасликни сўраган.
Шунингдек, Қамчиқ довонидаги икки туннел орасида жойлашган ҳудудда бир кеча-кундузда жуда кўп ёғингарчиликдан ҳосил бўлган сув оқими автомобиль йўлининг остки қисмини ўпириб туширган.
Тошкент шаҳрида бир неча кундан буён давом этаётган ёғингарчилик пойтахт аҳолиси учун қатор ноқулайликлар туғдирмоқда. Айрим кўчаларда тўпланиб қолаётган сув ҳайдовчи ва йўловчилар ҳаракатини мураккаблаштирмоқда. «Дарё» ҳолатга аниқлик киритиш мақсадида Тошкент шаҳар ҳокимлигидан изоҳ олди. Ҳокимлик кўчаларда сув йиғилиб қолишига одамлар томонидан ташлаб кетилган ахлатларни сабаб қилиб кўрсатди.
«Ўзгидромет» маълумотига кўра, вақти-вақти билан ёмғир ёғиши кузатиладиган беқарор об-ҳаво кейинги ҳафтанинг биринчи ярмигача сақланиб туради. Айрим вилоятларда кучли шамол ва момақалдироқ бўлиши мумкин.
Изоҳ (0)