“Chelsi”ning bank hisoblari vaqtinchalik to‘xtatildi. Bu haqda Sky Sports xabar bermoqda.
Buyuk Britaniyaning eng yirik banklaridan biri Barclays Roman Abramovichga qarshi qo‘llangan sanksiyalar tufayli klub hisobini bloklab qo‘ydi.
Bunga “Chelsi” tomonidan futbol faoliyatini davom ettirish uchun berilgan litsenziyani qayta ko‘rib chiqish sabab bo‘lgani aytilmoqda.
10-mart kuni Buyuk Britaniya hukumati “Chelsi”ning sobiq xo‘jayini Roman Abramovichga nisbatan sanksiyalar kiritdi. Rossiyalik tadbirkorning mamlakatdagi aktivlari muzlatildi. Abramovichga qo‘yilgan sanksiyalar “Chelsi”ning sotilishiga to‘sqinlik qiladi.
Endilikda “Chelsi” o‘z o‘yinlariga chipta sota olmaydi. Shuningdek, londonliklar klubiga transferlarni amalga oshirish va futbolchilar bilan shartnoma uzaytirish taqiqlangan.
Eslatib o‘tamiz, 27-fevral kuni Abramovich Ukrainadagi vaziyat tufayli “Chelsi” boshqaruvini klub xayriya fondiga topshirdi. 3-mart kuni esa 2003-yildan beri boshqarib kelayotgan jamoasini sotishga qaror qilganini ma’lum qildi.
Avvalroq UFC sobiq chempioni Konor Makgregor London jamoasini xarid qilishga tayyorligini bildirgandi. Saudiya Arabistoni konsorsiumi ham “Chelsi”ni xarid qilish uchun kurashga qo‘shilgandi.
Izoh (0)