«Челси»нинг банк ҳисоблари вақтинчалик тўхтатилди. Бу ҳақда Sky Sports хабар бермоқда.
Буюк Британиянинг энг йирик банкларидан бири Barclays Роман Абрамовичга қарши қўлланган санкциялар туфайли клуб ҳисобини блоклаб қўйди.
Бунга «Челси» томонидан футбол фаолиятини давом эттириш учун берилган лицензияни қайта кўриб чиқиш сабаб бўлгани айтилмоқда.
10 март куни Буюк Британия ҳукумати «Челси»нинг собиқ хўжайини Роман Абрамовичга нисбатан санкциялар киритди. Россиялик тадбиркорнинг мамлакатдаги активлари музлатилди. Абрамовичга қўйилган санкциялар «Челси»нинг сотилишига тўсқинлик қилади.
Эндиликда «Челси» ўз ўйинларига чипта сота олмайди. Шунингдек, лондонликлар клубига трансферларни амалга ошириш ва футболчилар билан шартнома узайтириш тақиқланган.
Эслатиб ўтамиз, 27 февраль куни Абрамович Украинадаги вазият туфайли «Челси» бошқарувини клуб хайрия фондига топширди. 3 март куни эса 2003 йилдан бери бошқариб келаётган жамоасини сотишга қарор қилганини маълум қилди.
Аввалроқ UFC собиқ чемпиони Конор Макгрегор Лондон жамоасини харид қилишга тайёрлигини билдирганди. Саудия Арабистони консорсиуми ҳам «Челси»ни харид қилиш учун курашга қўшилганди.
Изоҳ (0)