Britaniya hukumatining Roman Abramovichga qo‘ygan sanksiyalari tufayli “Chelsi”ning bir qator homiylari jamoa bilan hamkorlikni to‘xtatmoqda.
Jumladan, Three telekommunikatsion kompaniyasi “Chelsi” bilan hamkorlikni to‘xtatdi.
“Hukumat tomonidan yaqinda e’lon qilingan sanksiyalardan kelib chiqib, ‘Chelsi’ bilan hamkorlikni vaqtincha to‘xtatishni, keyingi ogohlantirishgacha logotipimizni futbolkalar va maydon atrofidan olib tashlashni so‘rab qolamiz.
Ushbu qaror jamoaning jonkuyar muxlislariga ta’sir qilishini bilamiz. Biroq, vaziyat va hukumatning sanksiyalarini hisobga olgan holda, biz buni to‘g‘ri deb hisoblaymiz”, — deydi “Chelsi” bosh homiysi vakili.
London klubinining texnik homiysi hisoblangan Nike kompaniyasi ham jamoa bilan hamkorlikni to‘xtatishni o‘ylamoqda.
2016-yilda “Chelsi” va Nike 15 yilga mo‘ljallangan 900 million funtlik shartnoma imzolagandi. Agar kompaniya “aristokratlar” bilan ishlashdan bosh tortsa, u holda klub 540 million funt sterling yo‘qotadi.
10-mart kuni Buyuk Britaniya hukumati “Chelsi”ning sobiq xo‘jayini Roman Abramovichga nisbatan sanksiyalar kiritgandi.
Eslatib o‘tamiz, 27-fevral kuni Abramovich Ukrainadagi vaziyat tufayli “Chelsi” boshqaruvini klub xayriya fondiga topshirdi. 3-mart kuni esa 2003-yildan beri boshqarib kelayotgan jamoasini sotishga qaror qilganini ma’lum qildi.
Avvalroq UFC sobiq chempioni Konor Makgregor London jamoasini xarid qilishga tayyorligini bildirgandi. Saudiya Arabistoni konsorsiumi ham “Chelsi”ni xarid qilish uchun kurashga qo‘shilgandi.
Izoh (0)